HSDyî bi bi eşkerayîyêk da zanayene ke hêzê artêşa tirkî ya dagirkere û çeteyê girêdayeyê aye mîyanê 24 saetanê peyênan de xeylê reyan hêrişê herêmanê ke binê kontrolê Meclîsê Leşkerî yê Suryanî de yî û teberê sînoranê adirbirnayîşî de yî kerdî. HSD dîyar kerd ke hêrişan vera xeylê asur û suryanî koç kerdî
Merkezê Resnayîşî yê Hêzê Sûrîyeya Demokratîke (HSD) derheqê şer û pêkewtişanê mabenê hêzê înan û hêzê dagirkeran yê dewleta tirkî û çeteyan yê 24 saetanê peyênan de eşkerayîyêka nuştekî da. HSDyî da zanayene ke roja 36. yê xoverdayîşî de hêrişê dewleta tirkî û çeteyê girêdayeyê aye dewam kerdî. HSDyî dîyar kerd ke hewa û bejayî ra hêrişê pêroyê sînor û herêma sivîlan ame kerdene.
“TIL TEMIR Û ZIRGAN
* Artêşa tirkî ya dagirkere û çeteyê pabesteyê aye bi çekanê giranan û teyareyanê bêmerdimî hêrişê dewanê Ing El Hewa, Ebûş û Ûm Şeîfa yê ke binê kontrolê pawitişê Meclîsê Leşkerî yê Suryanî de yî û teberê raşteyanê adirbirnayîşî de yî, kerdî.
* Artêşa tirkî ya dagirkere hêrişanê xo yê serê herêma asur yê bakurê Til Temirî zêdîna û hewl da ke herêmê ke teberê raşteyanê adirbirnayîşî de yî, dagir bikera. Netîceyê hêrişan de komê zêde asurî mecbur mendî ke dewanê x ora koç bikerî.
* Hêzê dagirkerî bi tank, top û teyareyanê bêmerdimî hêrişanê serê dewanê Ezîziyê, Dawûdiyê, Erbeîn û Til Lebenê domnayî û hewl dayî ke dewan dagir bikerî. Teyareyê bêmerdimî yê artêşa dagirkere ambulansêk ke waştêne birîndaran herême ra bivejno zî hedef girewtî û netîce de wesayît veşîya. Şoforê wesayîtî zî şehîd bî.
* Sewbîna ame zanayene ke artêşa tirkî ya dagirkere xeylê herêmanê sivîlan de mayinan ronena ke şarê sivîl nêeşko agêro cayê xo.
EYN ÎSA
* Artêşa tirkî ya dagirkere û çeteyê pabesteyê aye bi çekanê giranan, tank, obus û teyareyanê bêmerdimî hêrişê dewanê Mesûdiyê, Kefîfê û Xirbit Beqereyê kerdî û hewl dayî ke herême dagirbikerî. Artêşa tirkî ya dagirkere teyareyanê bêmerdimî xeylê raşteyan bombardûman kerde.
* Netîceyê xoverdayîşê hêzê Meclîsê Leşkerî yê Suryanî de artêşa dagirkere ra hûmarêka zêde çeteyî ameyî kiştene.
* Nê hêrişanê bi tank, top û teyareyanê bêmerdimî de 4 embazê ma û hûmarêk şervanê Meclîsê Leşkerî yê Suryanî şehîd bîyî. Sewbîna 14 embazê ma zî birîndar bîyî.”
