Hûmara menga çeleyî ya rojnameyê cinîye Newaya Jin bi manşetê ‘Ma milçîkê Sîmir ê, ma welanê xo ra newe ra ganî benê’ vejîyaye
Hûmara 178. ya Newaya Jin a ke bi formetêkê taybetî ameye amadekerdene giranîye dana Qirkerdişê Parîsî ser ke 9ê çeleyê 2013î de ame kerdene. Hûmara de qala pêro qirkerdişan û qirkerdişê her hîrê cinîyan ê şorişgêran yena kerdene.
Elîfe Mercan bale ante cinîyan ser o ke hetê sîstemê kapîtalîstî ra ameyî kiştene û no seba cinîyan asteng nêbo. Mercane vat: “No seba ma bi cesaret ke ma dest pê têkoşînê neweyî bikerê.”
Besîme Gonca qala şahîdîya xo ya xoverdayîşê îdareyê xoserî kerde û şexsê Sêvê Demîr, Fatma Uyar, Pakîze Nayîr, Bejîn, Ferîde û Asya Yukselan de rayberîya cinîyan vist vîrî.
Aktîvîsta Tevgerê Cinîyanê Azadan (TJA) Gulcîhane Şîmşek zî bale ante têkoşînê her hîrê cinîyanê ke Parîs de ameyî qetilkerdene.
Denîze Bîlgîn qala Sakîne Cansiza ke ronayoxanê PKKyî ra yew a kerde ke bi têkoşîn û cuya xo şoriş vurna û vat: “Îqtîdarî hêzanê nê kesan ra tersenê ke xo kerd şoriş.”
Sema Mazlum zî Cansize sey ”manîfestoyêk” pênas kerd û cuya ci ya têkoşînî ser o nuşt.
Rojnameyî xo resna şagîrtanê Sakîne Cansiz ê Kampa Mexmûrî û vînayîşê înan ê derheqê Cansize de pare kerdî.
Zerya Gul û Gulistan Îke zî giranîye daye kesayetanê ke vera polîtîkayanê qirkerdişê cinîyan rayberîya têkoşînê cinîyan kenê ser.
Zîlan Dîyare qala Fîdane Dogan kerde û vat: “Şorişgêrêke bîye ke pê pêro kesayeta xo fedakarîye kerde.”
Dîlane Amed zî taybetmendîyanê bingeyînan ê Leyla Soylemez, cigêrayîşanê aye û dînamîzmê aye yê têkoşînî ser o nuşt.
Eylem Ronî zî çalakîyê cinîyan ê bi danî yê ke bîyî sembol ercnayî û vist vîrî.
Hûmara newîye ya rojnameyî de aktîvîsta femîniste ya îtalyane Gea Pîccardî reyde roportajêk ame kerdene ke Pîccardî perspektîfê eko-femînîstî Têgêrayîşê Azadîye yê Kurdîstanî û Jineolojîye ser o doktora kerde.
