Rejîmê Sûrîye 27ê sibate de qezaya Seraqîbî ya Îdlîbî de bi hetkarîya Rûsya hewa ra hêrişê Hêzê Çekdarin yê Tirkî (TSK) û komê ke Tirkîya paştî dana înan kerdî. Goreyê hûmara fermî netîceyê hêrişî de 33 leşkerî merdî û 30 ra zêde leşkerî zî birîndar bîyî.
Leşkerê birîndarî Nêweşxaneyê Dewlete yê Reyhanli, Nêweşxaneyê Dewlete yê Hatayî, Nêweşxaneyê Dewlete yê Newe yê Hatayî, Nêweşxaneyê Dewlete yê Kirikhanî û Nêweşxaneyê Perwerdeyî û Cigêrayîşî yê Gulhanyî de yenî tedawîkerdene. Sewbîna ame zanayene ke cenazeyê ke nê nêweşxaneyan de yî bi nimite erşawîyenî bajaranê înan û destûr nêdanî ke dîmenê nê gaman bêro antene. Ame zanayene ke eksê eşkerayîya Walîtîya Hatayî, Nêweşxaneyê Dewlete yê Hatayî de xeylê leşkerê birîndarî yê ke cuya înan ver bi tehluke de ya, estî. Nêweşxaneyê Dewlete yê Hatayî û Nêweşxaneyê Dewlete yê Newe yê Hatayî de xeylê leşkerê birîndarî yê ke rewşa înan zaf giran a, zî estî. Ti hawayî destûr nêdîyeno ke sivîlêk daxî dekewo cayê ke leşkerê birîndarî tede yenî termankerdene û ekîbê weşî sewbîna bajaran ra sewqê nêweşxaneyan ameyî kerdene.
Badê hêrişê merkezê Hatay û cêracorê sînorê Sûrîye de tedbîrî ameyî girewtene û sînor ser de teyareyê şer yê F16 firenî. Sewbîna verê leşkeranê serê sînorî de polîsê normal û polîsê hereketê taybet zî bi caa bîyî. Taybet zî cêracorê sînorê Yayladagî û Kilîsî de tedbîrî ameyî girewtene û Reyhanli, Kirikhan, Hassa û Kumluyî de zî hetê dekewtiş û vejîyayîşî de tedbîrî ameyî girewtene. Vîşêrê înan bêmaben leşker û muhîmatê leşkerî ver bi Îdlîbî yenî erşawitene.
Rojnamegerê ke wazenê nê gaman taqîp bikerî zî hetê polîs û leşkeran ra yenî astengkerdene û vîşêrê eşkerayîya walîtî û selahîyetdaranê dewlete tu çîyêk nîno parekerdene. Sewbîna koçberanê Hatay û qezayanê ci rê mesaj yeno erşawitene ke keyeyanê x ora nêvejîyî.
Çimeyêko ci ra zaf bawer
Goreyê xebera çimeyêko ci ra zaf bawer: “Hêrişê 27ê sibate de hêrişê taburo ke Kayserî ra ameybî û sewbîna taburêk ame kerdene. Hêriş de heta nika 160 leşkerî merdî û nizdîyê 300 leşkerî zî birîndar bîyî. Vîşêrê leşkeran xeylê HTŞyî zî merdî. Ma hûmara înan nêzanî. Labelê hêrişê di tabura name kerdene. Wirdî taburê ma zî raşte ra temamî wedarîyayî. 28ê sibate de xeylê cenaze û leşkeranê birîndaran ardî Reyhanli. Dewlete hûmara raşte nêvana. Nika ma Rûsya reyde şer kenî. Ewro leşker, polîs û polîsê taybet, malzemeyê leşkerî, qomando ver bi sînor erşawîyenî. Beno ke Sûrîye nişka ra hêriş bikero.”
Xebatkarêk weşîye
Xebatkarêk weşîye ke nêwaşt nameyê xo bido zî eşkera kerd ke hêriş de 350 ambulansî şîyî Berê Sînorê Cîlvegozî û seba ke hûmara merde û birîndaran zêde bî, bajaranê dorme ra zî ambulansî wazîyayî. Xebatkarêk weşîye wina va: “Ma bi xo cenazeyan hûmarte. Hûmara cenazeyan zêde ya.” HATAY
