Rojnameyê Xwebûnî 21ê kanûna 2019î de dest bi weşanê hewtane kerd. Rojnameyê Xwebûnî ke hewte de reyêk yeno çapkerdene û tewr zêde serê ziwan û kulturî de weşan keno, hûmara xo ya 55an vejîya hemverê wendoxan. Hûmara 55. bi manşetê ” Romanên bextewar tune ne” yanî bi zazakî ‘Romanê bextewar çin ê’ vejîya. Rojname na hûmara xo de bale ante 3 cinîyê kurd ser û bi sernameyê “Qetilkerdişê ‘3 cinîyê azade’ ra 8 serrî derbaz bî” qetilkerdişê Sakîne Cansiz, Fîdan Dogan û Leyla Şaylemeza ke paytextê Fransa Parîsî de hetê endamê MÎTî Omer Guneyî ra ameyî qetilkerdene, ard vîr.
Sewbîna rojname de semedê xoverdayîşê zîndanan wina ameyo vatene: “Çalakîya tepişteyan bi koma 8. dewam kena. Her ke şono hûmara tepişteyanê ke tewrê çalakîya grevê vêşanîye yê bêdem û bêagêrayîşî benê zêde bena. Heto bîn de îqtîdarê AKPyî vera xoverdayîşê zîndanan xo ker û lal kerdo û derheqê babete de tu eşkerayî nêdano. Çalakgerê grevê vêşanîye ra Mehmet Sidik Barano ke Zîndanê Tîpa Lyî yê Kalkandereyî yê Rîzeyî de tepişteyo bi rayîrê pêvînayîşê telefonî keyeyê xo rê vat ke cigêrayîşê zit înan ser de yeno ferzkerdene. Pîyê çalakgerî Temîn Baranî vera caardişo kêyfî vejîya û dîyar kerd ke cigêrayîşê zitî caardişê Esat Oktay Yildiranî yo û ê heta peynî paştî danê waştişanê domananê xo.”
Ripelê Kirmanckî
Rojnameyê Xwebûnî ke hewte de reyêk yeno çapkerdene de ripelêk zî kirmanckî esto. Ripelê kirmanckî yê no hewteyî de koncikê Firçeya Şikite de nuşteyê Gulçîn Adare ê bi sernameyê “Keştîya multecîyan de bêwar a” esto. Adare beşêk nuşteyê xo de wina vana: “Verê ke ez şima rê qalê rayîrwanîya keştî bikera, wazena şima bibê mêmanê hîkayeya mi. Ez kênayêka 15 serrî ya. Nameyê mi bêwar a. Ma welatêk Rojhelato Mîyanên de pêwa dadî, babî û di wayê min ê qijî ma keyeyêk hewşeyîn de ciwîyayîne. Babîyê mi karê necarî kerdêne û dadîye mi zî terzîxaneyê ci bi. Ez şîne wendegeh. Hevalê mi zaf bî û ma yewbînan ra zaf heskerdêne. Hevalê mi ge-ge ameyîne hewşeyê ma û ma pê dir tewir tewir kayî kay kerdêne. Cuya ma bi weşî derbaz bîne. Ma nêzanayîne ke gonîwerê ke rî û ruhê înan tarîyê do ma cuya ma ra, welatê ma ra bikerê. Ez qet nêwazenê a roja xirab bîyarî xo vîr. Ez vana qey şina o wext û reyna reyna ciwîyena. Vengê topan, vengê guleyan, vengê qîrîn û hewara tutan û dayîkan!..Ma pey xo de zaf çî verda la ê vengî her wext mi dir bî, ruhê mi de û hewnanê mi de bî. Êdî o ware ma rê kerdib sey cehenem. Ma mecbûr bî ke cayê xo terk bikerê û şêrê cayêk asayîş. Mi rê zaf zehmet ame; terkkerdişê kuçe û keyeyê xo, welatê xo û vîrardişanê xo.” AMED
