Çalakiya nobetê ya malbatên girtiyên di greva birçîbûnê de li ber Girtîgeha Gebzeyê carek din hat astengkirin. Malbatan bertek nîşanî polîsan da û wiha gotin: “Hûn me binçav jî bikin û bikujin jî em ê werin.”
Malbatên girtiyên li dijî tecrîdkirina Rêberê Gelê Kurd Abdullah Ocalan di greva birçîbûnê de ne ji bo piştevaniyê di roja 20’emîn de xwestin li ber Girtîgeha Tîpa M a Gebzeyê çalakiya nobetê li dar bixin û carek din polîsan ew asteng kir. Nûner û endamên Partiya Sosyalîst a Bindestan (ESP) a Stenbolê, Federasyona Komeleyên Ciwanên Sosyalîst (SGDF), Jinên Ciwan ên Azad (OGK) û Weqfa Lêkolînên Çand-Huner û Perwerdehiy Zanista Estetîk (BEKSAV) jî destek dan malbatan.
Malbat û beşdarvan li ber avahiya HDP’ê ya Gebzeyê li hev kom bûn û xwestin biçin ber girtîgehê. Polîsan pêşiya malbatan girt. Malbat û polîsan nîqaş kirin. Malbatan bertek nîşanî polîsan da û wiha gotin: “Em ji bo zarokên xwe li vir in. Hûn çidikin bikin em ê dest ji çalakiya xwe bernedin.” Malbatan çalakiya rûniştinê li dar xist.
Polîsên ku malbatan dorpêç kir û got ku heke malbat çalakiya xwe dewam bikin dê wan binçav bikin. Malbatan jî wiha got: “Heta parêzerên me neyên em ê ranebin. Heke hûn binçav jî dikin bikin. Hûn me li vir jî dikujin bikujin.”
Polîsan mudaxeleyî malbatan kir û her kesî bi zorê rakir ser piya. Malbatan bertek nîşanî polîsan da û vegeriyan avahiya HDP’ê. Malbatan got dê sibê jî çalakiya xwe berdewam bikin. KOCAELÎ
