Hunermendan ji bo êrîşa li hemberî Bakur û Rojhilatê Sûriyeyê gotin “talankirina mirovahiyê ye” û xwestin şer raweste
Li Êlihê, hunermendan êrîşa Hêzên Çekdar ên Tirk (TSK) a li hemberî Rêveberiya Xweser a Bakur û Rojhilatê Sûriyeyê nirxandin û gotin, ev êrîş “talankirina mirovahiyê” ye.
Muzîkjen Şerzat Arslan ku di bin banê Navenda Çandê ya Biharê de dixebite, diyar kir ku êrîşa tê kirin talankirina xweza û mirovahiyê ye û wiha got: “Ger em naxwazin mirov bimirin, şer çê nebe û xweza neyê talankirin pêşî divê em nerazîbûna xwe ya li hemberî vî şerî nîşan bidin û paşê ji bo rawestandina vî şerî tev bigerin. Ez jî vî şerî şermezar dikim û dixwazim raweste.”
‘Em dengê xwe bilind bikin’
Şanoger Abdûllah Tarhan jî destnîşan kir ku divê hunermend ji bo rawestandina şer bitêkoşin. Tarhan wiha got: “Kesên ji xwe re dibêjin em mirov in, xweyî wijdan in divê li dijî vê êrîşê dengê xwe bilind bikin. Divê li dijî vê talan û barbartiyê dengê xwe li dengên heyî zêde bikin. Barê mezin dikeve ser milê hunermend û rewşenbîran. Divê vê yekê bi awayekî rast bilêv bikin.”
Wênesaz Ramazan Îlten jî ev tişt got: “Navê aştiyê li vê operasyonê kirin. Tiştekî ku mirin tê de be çawa dibe aştî? Gel, dixwazin li warê xwe bi awayekî azad û aram bijîn. Lê hin kes jî radibin dixwazin bi şer warê wan birûxînin. Ma dibe ku mirov li ser warê hin kesan warekî din çê bike?” ÊLIH
