Hunermend Îlkay Akkayaye daye danayene ke kesêke 4 serrî yo ke aye bi mergî reyde tehdît kena. Akkayaye veng daye Wezîrîya Edaletî ke tedbîran bigîra
Hunermend Îlkay Akkayaye serê hesabê xo yê medyaya komelkî de daye danayene ke kesêk 4 serrî yo ke aye bi mergî reyde tehdît kena. Akkayaye parekerdişê xo de veng daye Wezîrîya Edaletî ke tedbîran bigîra.
Hunermend Îlkay Akkayaye qala çîyê ke cuyaye kerde û vate:
“Seba ke sewbîna raybazêk nêmend ez nusena. Kesêk 4 serrî yo ke bi telefonî timî mi gêrena. Tehdîtkar cinî ya û problemê aye yê ciddî yê psîkolojîkî estî. Tehdîto ke 4 serrî yo dewam keno de tewr peynî konserêk ke mi yê Edene de qewikîyayîş vejîya.
Seba ke tedhdîtkare bêra tedawîkerdene mi hewl daye ke ez xo biresna keyeyê aye, labelê keyeyê aye zî tu çîyêk nêkerde. Wexto ke ez Erziromî ra seba konser şîya Edene hêrişê wezîfedaran kerde û bi no hawa hedîse resîya polîsan. Ez aye ra gerrekar nêbîya û mi tedawîya aye talep kerde.
Dosya şîyo verê destê avûkatê pêkeerdişî. Tehdîtkare nika heme şahidan gêrena û înan taciz kena. Tehdîtkar înan rê vana ke aye adresanê înan zana. Tehdîtkare şahidanê ke înan gêraya ra yew rê vata kekê aye hakim o û destê aye resena her cayî.
Ganî na kese verê ke zirar bida kesêk, tedbîrî bêrî girewtene. Tehdîtkare mi û her kesî bi mergî reyde tehdît kena. Şahidan ra yewî nika gêraya û vata ke ez do to bikişa. Seba ke malumatê mi yê şexsî kewtî destê kesêka tehdîtkare zî ez rewşe protesto kena.”
