Parlamenterê HDPyî yo verên yê Çewlîg û Amedî Îdrîs Balukenî şarê Çewlîgî rê mesaj şirawit û va: “Ma cehd kenê ke tewirê rastî yê şarê xo rê layîq bibê. Ma umîd û tewirê xo pawenê û vanê “Bena hol.”
Parlamentero verên yê Partîya Demokratîke ya Şaran (HDP) yê Çewlîg û Amedî Îdrîs Balukenî Zîndanê Sîncanî ra şarê Çewlîgî rê mesaj şirawit. Mesajo ke Balukenî derheqê weçînitişê cayîyî de şarê Çewlîgî rê şirawit wina yo.
“Ez bi ewladê şarê xo yê fedakar, cesûr û welatperwerî bîyayîşî serberz a, ez şarê ma bi hîsanê xo yê zîzan, bi hurmet û heskerdiş silam kena. Kesê ke wazenê ma bi mûndeyanê têlinan, şîşanê asinênan û dêsanê betoninan cîya bikerê, wa biewnîrê halê ewroyî yê meydanê Çewlîgî ra ke senî zerrîya ma pîya erzena û xo rê dersanê tarîxîyan ci ra vejê. Şarê Çewlîgî tarîx de çi rey hemverê polîtîkayanê zext, zulm û zordarîye de sereyê xo nêna ro. Ma zî cehd kenê ke nê tewirê tarîxîyî yê şarê xo rê layîq bibê.
Wa şarê ma nê bizano ke heta ewro ma îradeyê înan sey kerre bi hawayêkê saxlemî temsîl kerd, ma hemverê çewî de sere nêna ro. Tîya ra tepîya zî sey gerekîyêka pêgirewtişê ma yê şar û tarîxî rê ma do heman tewirê xo bidê dewamkerdene. No tewirê ma wayîrê hêzêk o ke eşkeno heme dês, têl û asinanê mabênê ma û şarê ma raste ra wedaro. Bedelê ci çi beno wa bibo ma do mucadeleyê xo yê anor û heysîyetî bi aşitî, demokrasî û azadîye tacîdar bikerê.
Na manaye de weçînitişê cayîyî yê vernîya ma xeylî muhîm ê. Şarê Çewlîgî do tewirê xo yê serkêşî ke her dewrê tarîxîyî de ramoto do nê weçînitişî de zî ramojno û do dost û dişmen her kesî rê ramojno ke Çewlîg de bi zext, zordarî û zulmî çi rey netîce nêno girewtene. Şarê Çewlîgî do ê kesanê ke bi îdîaya mezlûmî ameyî la bîyî zalim înan ra sindoqe de hesap biperso. Nê ra gumanêk mi çino ke şarê ma do dorê namzedanê şaredarîya ma Senem Çakas û Hîşyar Ozsoyî de bêro têhet û 31ê Adare de serkewtişî bi dest bifîno.
Ez bi bawerîya ke her reya ke do sindoqan ra ma rê vejîyo seba aşitî, demokrasî û azadîye havilêka pîle bikero û bi na bawerîye ez şima hemine rê silaman kena. Ma umîd û tewirê xo pawenê û vanê ‘Bena hol.’
Îdrîs Baluken
Zîndanê Tîpê Fyî yê Sîncanî” AMED
