Komîsyonê Zîndanî yê Şaxê Şirnexî yê ÎHDyî derheqê Zîndanê Şirnexî de raporê xo weşana. ÎHDyî va: “Roqiranê tepişteyan ra gonî yena, bedenê înan de zî birînî vejîyayê û dorê çimê înan bîyo tarî.”
Avûkatanê endamê Komeleya Heqê Merdiman (ÎHD) yê Komîsyonê Zîndanan yê Şirnexî derheqê halê tepişteyanê Zîndanê Şirnexî de raporêk amade kerd. Rapor xo seperneno hayîdarîyanê tepişteyan. Rapor derheqê halê weşîye yê tepişteyan û hêrişo ke hemverê 20 tepişteyan de ameyo kerdene de yo ke ê hemverê tecrîdê serê Rayberê Şarê Kurdî Abdullah Ocalanî de grevê vêşanîye de yê. Rapor de ca dîyayo qalkerdişanê 9 tepişteyan zî.
Tespîtê ke goreyê qalkerdişanê tepişteyan rapor de ca girewtê wina yê:
*Ameyo dîyene tepişteyê ke kewtê grevê vêşanîye zaf kîlo kerda vînî, bi zehmetî rakewenê, dewqa înan şina, nebiz de problemê înan esto, virêjenê, roqiranê înan ra gonî yena û dorê çimê înan bîyo tarî.
*Roja ke grevê vêşanîye dest pêkerdo ra nata, ganî her roje hetê doktoran ra biameyêne kontrolkerdene, la kontrolê kilo, şekir, nebiz hetê xizmetkaranê weşîye û gardîyanan ra yenê kerdene.
*Tepişteyê cinîyî hetê personelanê zîndanî ra tim bi kamerayan yenê kontrolkerdene.
*Serê tepişteyan zaf yeno sehnayene, têgêrayîşê ke hemverê anorê merdimîye de yê yenê kerdene.
*Gama ke kewenê zîndan serê tepişteyan de ferz kenê ke xo bikerê viran û wina serê înan bisehnê.
*Tayê gardîyanî provakasyon kenê, wazenê qewimîyayîşî virazîyê û serê tepişteyanê sîyasîyan de zextan hîna bikerê vêşî.
*Waştişê vurayîşê koxuşan nênê qebûlkerdene, nêverdanê ke tepişteyê sîyasîyî bêrê şirawitene zîndananê bînan û wextê şirawitişê nêweşxaneyî de probleman vejenê.
*Xebatê ke çarçewaya xebatanê sosyalan de yê yenê astengkerdene.
Nameyê Tepişteyan:
Tepişteyê ke 16ê Çele ra nata grevê vêşanîye de yê nê yê: Hakan Kutluk, Agît Bîrlîk û Osman Beytûr.
Êyê ke 31ê Çele ra nata grevê vêşanîye de yê nê yê: Onder Poyraz, Salîh Kutluk û Hakan Petekkaya.
Êyê ke 1ê Adare ra nata grevê vêşanîye de yê nê yê: A. Kerîm Sevînç, Îzzettîn Ormanli ,Mesûd Olmez, Abubekîr Neng, Mûsa Kulter, Halîl Kabak, Bahattîn Alkiş, Yilmaz Ugur, Mahsûn Guçlu, Serhat Sevîşoglu û Mehmet Alî Bayar.
Êyê ke 15ê Adare ra nata kewtê grevê vêşanîye nê yê: Fatma Çetînkaya, Zeynep Mete û Rojda Topçû. ŞIRNEX
