Çalakgerê greva birçîbûnê Îmam Şîş ku li dijî tecrîdê 161 rojin li ber xwe dide, bi daxuyaniyekê ragihand ku çalakiya wan gihîştiye armanca xwe û dawî li çalakiya xwe tîne
Ji bo rakirina tecrîda girankirî ya li ser Rêberê Gelê Kurd Abdullah Ocalan, welatiyê bi navê Îmam Şîş li Gallerê dest bi greva birçîbûnê ya bêdem û bêdorveger kir. Çalakiya Şîş îro di roja 161’emîn de didomiya. Piştî ku peyama Ocalan bi rêya parêzerên wî bi raya giştî re hate parvekirin û xwest ku çalakî bi dawî bibin, Îmam Şîş jî têkildarî mijarê daxuyaniyek da.
Berxwedêr Îmam Şîş di daxuyaniyê de destnîşan kir ku çalakiya wan bi ser ketiye û gihîştiye armanca xwe. Şîş daxuyand ku bi vê boneyê jî ew dawî li çalakiya xwe ya greva birçîbûnê ya bêdem û bêdorveger tîne û ev peyam parve kir: “Me derbeke giran li faşîzmê xist. Lê ev nayê wateya ku têkoşîn me bi dawî bûye. Ji niha û şûnde li dijî faşîzmê têkoşîna me dê bi rê û rêbazên cuda berdewam bike.” GALLER
