Serekê Şaredarîya Stenbolî Ekrem Îmamoglu ame Amed û wina va: “Ma Stenbol de hîs kerd ke çiqas boya ma teng bîyo. Tayînkerdişê qeyûman ma zaf hîssim kerd.”
Serekê Şaredarîya Stenbolî Ekrem Îmamoglu û heyeto ke ci reyde Stenbol ra ame saetanê serê sibayî de resa Amed. Rayîrberê CHPyî yê Amedî û hemwelatijî Teyaregehê Amedî de Îmamogluyî pêşwazî kerdî. Hetgirê Amedspor zî şîyî pêşwazîkerdişê Îmamogluyî. Pêşwazîkerdişî de heskerdişê Îmamogluyî bale ant. Îmamogluyî dima ra derbazê awanîya Rêxistina CHPyî ya Amedî bî û ewja de eşkerayî da. Îmamoglu eşkerayî de bale ant tayînkerdişê qeyûman ser.
Îmamoglu eşkerayîya xo de wina va: “Ma Stenbol de hîs kerd ke çiqas boya ma teng bîyo. Ma bawer kenî ke no xeletî demêko kilm de raşte ra bêro wedartene û çareserî bêro vînayene. Tayînkerdişê qeyûman ma zaf hîssim kerd. Tayînkerdişê qeyûman û dûrkerdişê şaredaran çîyêko şaş o. Vindetişê cîyakarî yê hemverê weçînitoxanê Amed, Mêrdîn û Wanî mah eme kesan hîssin kerd.”
Îmamoglu badê eşkerayî şî mezelê Serekê Baroya Amedî yê verên Tahîr Elçîyo ke Sûrî de ame kiştene ser û dima ra do şêro zîyaretê Şaredarîya Peyasî û Hemşaredarê Amedî Selçuk Mizrakli û Hemşaredarê Mêrdînî Ahmet Turkî. AMED
