Tirkîya turê diyînî yê weçînayîşê serekkomarîye de Recep Tayyîp Erdogan newe ra bibi serekkomar. Dima ke Erdogan reyna weçînîya lîra asta tarîxî de bêqîmet bîye û dolare bîye 20.09 lîra.
Erdoganî weçînayîşî ra dima qiseykerdişê xo yê verênî de ardbi ziwan ke ê do polîtîkayanê xo rê dewam bikerê, nêvurnê.
Ajansê mîyanneteweyî zî bi taybetî bale ancenê serê ekonomî û azadîye. Nê vanê ke Erdogan bê bernameyê ekonomî heta cayêkî eşkeno îdare bikero la nêeşkeno verê enflasyonî bigêro.
Fîrmaya Tellimerî ya Dubai ra Hasnain Malikî îfade kerd ke weçînîyayîşê Erdoganî îmkanê sermayedayîşî nêdano sermayedaranê xerîban û vat: ”Rayîrê krîzî yê giranî de tesîrê sermaye keno; enflasyon zaf berz o, mîqdarê faîzî zaf nizm o û rezervê doqîzî çin o.”
Ekonomînas Amerîka Roger Markî hişyarî daye ke krîzê Tirkîya beno ke xorin bibo û kontrolê sermaye bizêdîyo. Markî vat: ”Eke polîtîkayî nêrê vurnayene, Tirkîya ver bi krîzêkê berzî şina. Beno ke kontrolê sermaye hîna giran bibê. Bi nê hawayî zî beno ke merdimî pê zorî dolarî bikerê lîra. Beno ke tirkî do nêeşkê deynê xo yê teberê welatî bidê.”
