Înîsiyatîfê Rojnamegeranê Azadan bîlançoya aşma tebaxê aşkera kerd. Goreyê bîlançoyî tena mîyanê 10 rojanê peyênan yê aşma tebaxe de 15 rojnamegerî ameyî tepiştene, ameyî astengkerdene, deheqê înan de tehqîqat û doze ameyî akerdene
Înîsiyatîfê Rojnamegeranê Azadan (ÎRA) bi eşkerayîyêka nuştekî bale ant zextê rojnamegeran yê aşma tebaxe ser. Eşkerayî de ame dîyarkerdene ke zext û şîdetê rojnamegeran ser her ke şono zêdîyeno, her aşme rojnamegerî yenî tepiştene, tewqîfkerdene, muhakemekerdene û raştê cezayan yenî.
‘Derheqê rojnamgeran de tehqîqat dîya destpêkerdene’
Eşkerayîya nuştekî ya ÎRA de ame vatene ke amşma tebaxe zextê rojmageran ser vejîya peymeyêko tewr gird û wina ame vatene: “Aşma tebaxe ke çalakîyê komelkî raşteyan de zêde bî de zextê serê rojnamegeran zêde bî. Tena 10 rojanê peyênan yê aşma tebaxe de 15 rojnamegerî ameyî tepiştene. Rojnameger bi desan reyan raştê astengîyan yenî. Derheqê înan de tehqîqat û dozî yenî akerdene. Dayîşê bi seyan xeberan ame astengkerdene.”
‘Ganî zextê çapemenîye ser peynî bibî’
ÎRA eşkerayîya xo de da zanayene ke ê umid kenî ke nê zextî peynî bibî û qala waştişanê xo kerd: “Ma sey Înîsiyatifê Rojnamegeranê Azadan (ÎRA) wazenê ke nê zext û şîdetê keyfî yê teberê qanûnan demêko kilm de peynî bibî. Tirkîye de hema zî 146 rojnamegerî tewqîfkerde yî. Eke hukmat vaja welatê Tirkîye de demokrasî esto û ê hurmet nîşanê huqûqî danî, ganî bi lez rojnamegeran serbest vera bido û zextê serê rojnamegeran peynî bikero.”
Bîlançoya aşma tebaxe ya zextê serê rojnamegeran wina ya:
* 146 rojnamegerî tewqîfkerdene yî.
* 15 rojnamegerî ameyî binçimkerdene.
* Derheqê 2 rojnamegeran de tehqîqat ame akerdene.
* Derheqê 5 rojnamegeran de doze ameye akerdene.
* Ceza dîya 1 rojnamegerî. (2 serr û 4 aşm û 3 rojî).
* Resnayîşê 700 xeberan ame astengkerdene.
* Eştî serê keyeyê 1 rojnamegerî.
* 2 rojnamegerî raştê kutişî ameyî.
* 1 rojnameger raştê hêrişê çekdarî ame.
* Rojnamegerêk vera zêdebîyayîşê zextan de fek rojnamegerîye ra vera da.
* Rojnamegerê ke Wan, Amed, Mêrdîn û Stenbolî de raşteyan taqîp kerdêne, bi desan rey raştê astengîyê polîsan ameyî.
* RTUKî wezîfedar kerdî ke radyo û TVyê ke înternetî ser ra weşan kenî sansur bikero.
* Seba ke Nasnameya Zer ya çapemenîye asteng bikerî lîsteyek amade kerdî.
