Cinîya kurde Jîna Emînî 13ê êlule de Tehran de seba ke ‘gijikê ci aseno’ hetê polîsanê rejîmê Îranî ra ameye derbkerdene û 16ê êlule de zî dinyaya xo bedilnaye. Îran û Rojhelatê Kurdîstanî de çalakîyê protestoyî yê vera qetilkerdişê Jîna Emînî dewam kenê.
Îran û Rojhelatê Kurdistanî de serewedaritişê şarî de bi desan domanî hetê hêzanê dewlete ra ameyî qetilkerdene û bi seyan kesî zî ameyî destbendkerdene. Hêzê Îranî bi şîdet, teda û zorbazîye hêrişê çalakîkeran kenê. Goreyê Ajansê Xeberan a Human Rights Activists (HRANA) da zanayene ke heta nika çalakîyan de 18 domanî kişîyayê û nînan ra domano/a tewr pîl/e 12 serre bi/bîye.
Goreyê Rêxistina Efûyî ya Mîyanneteweyîye zî tewr tay 23 domanî ‘hetê hêzanê asayîşî yê Îranî ra bi hawayêkê îlegalî kişîyayê’ û serrê înan zî mabênê 11-17 de yê.
Rêxistinê komelê sivîlî vanê ke bîlanço hîna giran a. Komeleya Pawitişê Domanan a Îranî zî pare kerd ke eyaletê Sîstanî yê Belûcîstanî de tewr tay 28 domanî kişîyayî. Komele pê hesna ke aqîbetê domananê ke ameybî destbendkerdene nêzanîyeno û nê domanî temsîlê huqûqî ra bêpar ameyî verdayene.
