Herwiha piştî gotara Rêberê Komara Îslamî ya Îranê Elî Xamneyî, zextên li ser jinan zêde bûne û desthilat li ser hîcaba neçarî bi israre. Duh Cîgirê Giştî yê Serdozgeriya Îranê Ebdulsemed Xuremebadî bi fermana giştî bang li hemû polîsên li her derê Îranê kir ku li beramberî jinên ku hîcabên xwe davêjin, tundiyê bikarbînin.
Duh Cîgirê Serdozgerê Giştî yê Îranê Ebdulsemed Xuremabadî got: “Rakirina hîcatê sûcekî aşkere ye û yên bikin, wê ji derveyî cezayê darayî 10 roj heta 2 mehan werin girtin. Ên jinan teşwîqî rakirina hîcabê bikin, dibe heta 10 sal cezayê girtîgehê li wan were birîn.”
Hêjayî gotinê ye ku piştî qetilkirina jina kurd Jîna Emînî ango 4 mehin li Rojhilatê Kurdistanê û seranserê Îranê ji bo girtina mafê xwe yê rewa, bi pêşengtiya jinan, serhildana ‘Jin, Jiyan, Azadî’ didome.
Ji destpêka serhildana ‘Jin, Jiyan, Azadî’ heta niha gelên li Îranê ji bo girtina mafên xwe yên rewa gelek qurbanî dane, zêdetirî 500 kesan di encama êşkence û gulebarana raste rast a hêzên Îranê de jiyana xwe ji dest dane. Nêzîkî 20 hezar xwepêşander hatine girtin û her wiha li 112 xwepêşanderan cezayê bi darvekirinê hatine birrîn ku heta niha 4 xwepêşander hatine darvekirin.
