Serokê Amerîkayê Donald Trump dixwaze supayê pasdarên Îranê bixe lîsteya terorê. Rayedarên Îranê diyarkirin ku ger Amerîka vê biryarê bicihbîne, dê tu carî hêzên Amerîkayê yên li Rojavayê Asyayê xweşî bi xwe nebînin
Li gorî ragihandinên cîhanê, serokê DYA’yê Donald Trump biryar daye ku supayên pasdarên Îranê bixe nava lîsta terorê. Ev yek bû sedemê nerazîbuna Îranê. Wezîrê Derve yê Îranê û fermandarê giştî yê supayê pasdarên Îranê piştî van daxuyaniyan hişyariyên tund dan Amerîkayê.
Fermandarê giştî yê supayê Îranê Mihemed Elî Cehferî piştî van daxuyaniyê axivî û wiha got: “Ger Amerîka vê biryarê pêk bîne, wê hêzên Amerîka yên li Rojavayê Asyayê xweşî bi xwe nebînin û em ê li gorî siyaseta komara îslamî ya Îranê danûstandinê li gel wan bikin.”
Wezîrê Derve yê Îranê Mihemed Cewad Zerîfî jî li ser vê mijarê got ku ev biryar bi xwesteka Îsraîlê pêkhatiye û wiha got: “Ev biryar di berjewendiyê Îsraîl de ye. Ev demeke dixwazin supayên pasdarên Îranê bixin nava lîsteya terorê . Herkes dizane ku wê ev biryar çi encamên xirap bi xwe re bîne.” TEHRAN
