Iraq de 25ê Teşrîna Verêne de nawnayîşî çalakîyî newe ra amebî destpêkerdene. Hûmara merdeyan û birîndaran zî zêde bena
Paytextê Iraqî Bexda de û herêmanê başûrî û merkezîyan ê ke Şîîyê Erebî tede ciwîyenê, de seba ke hukmat hesabê bêmunasibîyan nêperseno, citkaran rê çareserîye nêna dîyene û meseleyê bêkarîye çareser nêbena, 1ê Teşrîna Verêne de nawnayîşî amebî destpêkerdene.
3 rojan ra nata çalakîyî bîyî zêde. Seba ke polîsî û hêzê asayîşî yê Iraqî bi çekan danê nawnayîşoxan ro, zafê kesî merdî û bi hezaran kesî birîndar bîyî.
Komîsyona Berze ya Heqanê Merdiman a Iraqî pare kerd ke 3 rojanê peyênan de protesto û şeran de 74 kesî merdî û 3654 kesî zî birîndar bîyî. Ame parekerdene ke 90 bînayê hukmatî û partîye zî ameyî vêşnayene.
Nê nawnayîşan de 158 kesî ameyî destbendkerdene, 123ê înan ameyî raverdene, 35ê înan hema zî yenê tepiştene.
Sereko Şîî Mukteda El Sadro ke paşt dano çalakgeran, veng da hêzanê asayîşî yê Iraqî ke ‘Bi çekan şarî rê hêriş mekê’ û vat ke “Şima hêzê pawitişê Iraqî yê. Ganî şima bi çekan şarî ro medê.”
Koma çekdaran a bi nameyê Saraya Selamî ya pabesteyê Mukteda El Sadrî ya, zî pare kerd ke “Seba pawitişê Iraqî û nawnayîşan ma pabeyê fermanê Sadrî yê.”
Endamanê Partîya Komunîste ya Iraqî û parlamenteranê Koalîsyona Saîrîunê Raîd Fehmî û Hayfa el-Emîn seba ke hukmat waştişanê nawnayîşoxan nêano ca wezîfeyanê xo ra îstîfa kerd.
Parlamenterê Basra Muzahîm Temîmî û parlamenterê koalîsyona Nasir Taha Dîfaî zî da zanayene ke heman semedî ra îstîfa kerd. BAXDA
