Meclîsê Asayîşê Weşîya Karî (ÎSÎG), “Raporê Merdişê serê Karî yê Karkeran” ê hîrê mengê ewil yê serra 2022yîne eşkera kerd. Rapor de ame dîyarkerdiş ke se ra 67 dayeyî çapemenîya netewî û se ra 33yî dayeyî zî spartê agahîyê karkeran, keyeyan, pisporê asayîşê karî, doktorê kargehan, sendîka û çapemenîya herêmî. Goreyê raporê ke ame eşkerekerdiş, hîrê mengê serre de 347 karkeran dinyaya xo bedilnaya.
Rapor de ame vatiş ke 312 karkerî bi meaş (karker û karmend) û 35 karker zî karê xo de xebityayê citkar û esnaf bîyê.
Hûmara tewr zêde yê sektorê înşaatî yo
Rapor de ame diyarkerdiş ke merdişê serê karî de sektorê înşeatan de 54 karkerî merdê, sektorê neqlîye de 45 karkerî, sektorê daristanî de 33 karkerî, sektorê bazirganî, buro, perwerde û sînema de 30 karkerî, sektorê metal de 27 karkerî, xizmeta weşîye komelî de 27 karkerî, sektorê şaredarî, karê pêroyî de 26 karkerî, cayê mêmanxane, şayî û kêfweşî de 15 karkerî, sektorê pawitişî, asayîşî de 13 karkerî, sektorê madenî de 12 karkerî, sektorê tekstîl, çermî de 10 karkerî, sektorê keştî, tersane, behr, keştîgehî de 9 karker, sektorê enerjî de 8 karkerî, sektorê neft, kîmya, lastîkî de 8 karkerî, sektorê dar, kaxidî de 5 karkerî, sektorê zexîre, şekir de 4 karkerî, sektorê rojnamegerî, çapemenî de 3 karkerî, sektorê çîmento, herre û camî de 2 karkerî, sektorê banka, fînans, sîgorta de karkerêke dinyaya xo bedilnaye.
Xeylê xo bê sendîka yê
Rapor de ame vatiş karkerê ke merdê 13 hebî endamê sendîkayan bîyê û 334 karkerî zî bêsendîka bîyê. Rapor de ame diyarkerdiş karkerê ke merdê 25 kesî ci ra karkerê cinî bîyê û 322 kesî zî karkerê zilam bîyê. Sewbîna rapor de ame eşkerakerdiş ke hîrê mengî yê ewil yê serre de 18 karkerê multecî yan zî koçberî dinyaya xo bedilnayê.
