Hepsî Mehmet Adsizo ke Zîndanê Xarpêtî de tewqîfkerde yo, vera îşkence, muameleyanê xirab û binpaykerdişan 18 rojî yo çalakîya rojeyê mergî de yo. Dayîka Mehmetî Radda Adsize waşte ke îşkenceyo ke bi domananê înan ser de yeno kerdene peynî bibo û vengê hîsgerîye daye partîyanê sîyasî û ÎHDyî
Hepsî Mehmet Adsizo ke Zîndanê Xarpêtî Hûmara 1. de odeyêka yew kesî de yeno tepiştene, pêvînayîşê telefonî yê keyeyê xo de da zanayene ke îşkence, muameleyanê xirab û binpaykerdişan vera 29ê temmuza 2019î ra nata çalakîya rojeyê mergî de yo. Dayîka Mehmetî Radda Adsize derheqê pêvînayîşî de qisey kerde û va: “Lajê mi ewilî Zîndanê Amedî de bî. Dima ra erşawitî Zîndanê Kurkçulerî yê Edene, ewja ra berdî Zîndanê Tîpa Tyî yê Osmanîye û Tîpa Cyî yê Burhanîye yê Balikkesîrî. Nê zîndnan de zî raştê eynî caardişan ameye.”
Dayîk Adsize ard ziwan ke badê qedexeyê pêvînayîşî yê 4 aşman ê pêvînayîşê Roşanê Qurbanî de Zîndanê Xarpêtî de yewbînan vînayî û wina dewam kerde: “Hewteyo verên ma pêvînayîşê telefonî kerde. Lajê mi va odeyêka yew kesî de yeno tepiştene. Gardîyanî odeya ke lajê mi tede maneno de dest û linganê ci girê dayî û bi dar paskilan lajê mi kutî. Kutiş vera perdeyê goşê lajê mi dirîyayo. Îşkenceyo ke ame kerdene vera zendanê xobirnayo û revîrî de verê doktorî de ameyo derbkerdene.”
Her roje yeno îşkencekerdene
Dayîk Adsize dewamê qiseykerdişê xo de va: “Lajê mi dîyar kerd ke her roje yeno îşkencekerdene, ê zit kenî û bi no hawayî îşkence bi ci kenî. Lajê mi rê ameyo vatene ‘Binê beyraqa tirkan de kesêk nêeşkeno çîyêk bikero ma. Ma dewlet î.’ Bi nê vatişan îşkence bi lajê mi kerdî.”
Zîndanê Xarpêtî de îşkence bi hepsîyan yeno kerdene
Dayîk Adsize tewr peynî veng daye ûwina va: “Lajê mi 29ê temmuza 2019î ra nata çalakîya rojeyê mergî de yo. Wa fek îşkence û zilmo ke yeno kerdene ra bêro veradayene. Zîndanê Xarpêtî de îşkence bi hepsîyan yeno kerdene. Ganî Komeleya Heqê Merdiman (ÎHD) û partîyê sîyasî çareserî bivînî.”
Derheqê babete de Zîndanê Xarpêtî yê Hûmara 1. ame gêrayene, la wina ame vatene: “Eke çîyêko winasî bibo daxî ma nêeşkenî malumat bidî. Wexto ke çîyêko winasî biqewimîyo, memurê dewlete eleqedar benî û tedbîranê ferz gênî. Dewlete na reyde eleqedar bena. Keye eşkeno derheqê babete de pêvînayîşê telefonî de malumat bigîro.” AMED
