Navenda Nûçeyan |
Li gorî ajansa nûçeyan a fermî ya ser bi rejîma Şamê SANA’yê, hêzên hewayî yên Îsraîlê di ser Golanê re gelek fuze avêtine Şamê.
Çavkaniyên leşkerî agahî dan ajansê û diyar kirin ku sîstema parastina hewayî ya Sûriyeyê gelek fuze têk birine, 7 leşker birîndar bûne û xisara madî çêbûye.
Artêşa Îsraîlê heta niha tu daxuyanî nedaye. Li gorî Saziya Çavdêriya Mafên Mirovan a Sûriyeyê, herî kêm şeş fuze li nuqteyên alîgirê rejîmê û milîsên Îranê ketine.
Saziya çavdêriyê ragihand ku sîstema parastina hewayî ya Sûriyeyê nekarî tu fuzeyan têk bibe. Saziyê berevajî ajansa nûçeyan a fermî diyar kir ku ji Mûxafizên Şoreşê yên Îranê 5 kes hatine kuştin.
Îsraîl ji Adara 2011’an dema destpêkirina şerê navxweyî yê Sûriyeyê û vir ve bi sedan carî êrîş biriye ser hêzên rejîmê û hêzên alîgirê Îranê. Heta niha berpirsyariya tenê çend ji van êrîşan li xwe girtiye.
