Di 28’ê tebaxa 2015’an de li navçeya Qoserê ya Mêrdînê polîsan Mazlûm Tûranê 16 salî kuştibû. Piştî kuştina Tûran doz dest pê kiribû. Dadgeha Cezayê Giran a 5’an a Mêrdînê 10 sal ceza li polîs Suleyman Esenboga birîbû. Piştî ceza hat birîn Esenboga serî li Dadgeha Îstinafê ya Amedê dabû.
Daîreya Ceza ya 1’emîn a Dadgeha Îstinafê jî cezayê li Esenboga hatibû birîn xera kir. Di biryara xwe de ji bo kuştina Tûran got ‘li gor hiqûqê’ û divê ceza li Esenboga neyê birîn. Her wiha dadgehê sedema biryara xwe jî aşkera kir.
Dadgehê di biryara xwe de aniye ziman ku roja bûyerê li Qoserê êrîşeke bombeyî pêk hatiye û ji bo vê tevdîr hatine girtin. Dadgehê, di biryara xwe de gotiye ji dîmenan dixuyê ku polîs Esenboga du caran bera Tûran dide û ji fîşekên Esenboga yek jê li cismekî hişk dikeve û dipebngize û li Tûran dikeve.
Dadgehê di biryara xwe de bal kişandiye ser madeya 30’yemîn a bi sernavê ‘şaşî’ ya Qanûna Ceza ya Tirk û gotiye: “Di dema pêkanînê de kesê unsûrên madî yên di qanûnê de hatine diyarkirin nizanibe, nikare bi awayekî qesdî tev bigere. Yanî di vê şaşiyê de qisûrdarî veşariye. Gava cezayek giran an jî sivik pêk bê, kesê şaşî kiribe dikare ji wan şaşiyan sûdê wergire.”
Dadgehê di berdewamiya biryara xwe de gotiye: “Kesê şaşî kiribe nayê cezakirin. Liv û tevgera Esenboga ne li dijî hiqûqê ye, neheqî tê de tuneye, rewa ye… Di çaçroveya peywira xwe de ji bo ewlehiyê ji wesayîta ku gotiye qey bombe tê de ye, xwestiye bisekine lê belê ji ber ku wesayît nesekiniye berdaye û Tûran miriye. Ji ber ku gotiye qey bombe di wesayîtê de heye ev şaşî kiriye û ev şaşî jî şaşiyeke jênerevîniyî ye.” MÊRDÎN
