Domana 11 serrî ke serrêke hetê merdimê xo ra rastê îstîsmaro zayendî yê sîstematîk ameye, keyeyê xo rê qala hedîse kerde, la keye aye ra bawer nêkerd û domane berdî pedagog. Serê vatişê domane tehqîqat dîya dest pêkerdene, la na rey mehkema ceza fîna war û tena 5 serrî û 6 aşmî ceza birnaye
Domana 11 serrî ke Stenbol de cuyena, mabêne 2016-2017î de hetê kesê bi nameyê M.yo 17 serrî ke merdimê înan bi ra rastê îstîsmaro zayendî yê sîstematîk ameye. Domane teşrîna verêne 2017î de hedîse keyeyê xo ra va û keye aye berd pedagogê Nêweşxaneyê Nêweşî û Weşîya Ruh ê Fakulteya Tipê Cerehpaşa yê Unîversîteya Stenbolî. Domane çîyê ke cuyabî qalî kerde û dîya kerde ke 2016î de reya yewin rastê îstîsmaro zayendî yê M.yî ke merdimê dayîka aye bîyo ameya û na rewşe tarîxê cîya cîyayan de dibare kerda.
Beşê Nêweşxaneyê Nêweşî û Weşîya Ruh ê Fakulteya Tipê Cerehpaşa ê Unîversîteya Stenbolî raporêk amade kerd û vejîya meydan ke domane rastê îstîsmarî ameya û ameya tehdîdkerdiş.
Pî domane xo ra bawer nêkerd!
Pêvînayîşê ke heyetî bi dayîka domane reyde kerde de dayîke dîyar kerde ke aye kêna xo bawer a. La pêvînayîşê ke pî reyde ame kerdiş de pî îdia kerd ke o kêna xo ra bawer nêkeno û M.yî domanêko pasîf o û nêeşkeno na çalakî bikero. Heyet û pedagog şîrovekerdişê xo yê hempar de hedîse Serdozgerîya Komare rê neql kerdî. Serdozgerî aşma çele yê 2018î de îfadeyê domane girewt. Gumanbar M.yî suc înkar kerd. Domane îfadeyê xo de dîyar kerde ke seba keyeyî vernê de aye ra bawer nêkerda, hedîse heme qalî nêkerda û dest daya serê Kuran û dima ra aye berdî pedagog.
Bi waştişê dadgehe heyetê 6. Îhtîsas yê Dezgeyê Tipê Edlî (ATK) yê Stenbolî rapor amade kerd. Rapor de ame tespîtkerdiş ke domane rastîyan vana. Roniştişê 5. yê doze de sucê ‘îstîsmarkerdişê zayendî yê domane’ 8 serrî ceza ame birnayene. La seba ke gumanbar 18 serrî pirr nêkerdo ceza vistî 6 serrî û 8 aşman, rewşa baş zî verê çiman de ameye girewtiş û ceza vistî 5 serrî 6 aşmî û 20 rojan.
Avûkata domane Dîdar Erdeme zî dîyar kerde ke mehkema sewîyeya tewr cêr de ceza daya. Dîdare daye zanayene ke domane badê travma, xo tewr xirab hîs kerda û wina va: “Na dosya xêrcê têkoşînê huqûqî wetayîr, rol û tesîrê diyalogê dayîke ke bi domane xo reyde awan kerda ramojneno. Hîsgêrîyê ke sazgehan ramojna yo zî serê qerar de tesîr kerdo.” STENBOL
