Serê berê keyeyê hemwelatî Yalçın Acarî yo ke Îzmîr de ciwîyeno de tehdîtê ‘elewîyan rê merg’ ame nuştene û nîşanê reykî nîya pa
Serê berê keyeyê hemwelatî Yalçın Acarî yo ke Îzmîr de ciwîyeno de tehdîtê ‘elewîyan rê merg’ ame nuştene û nîşanê reykî nîya pa. Acarî seba ke kêneyanê xo binayo serwîsê dibistanê ra ber akerdo û nîşanê reykî dîyo.
Acarî qiseykerdişê xo de va: “No şodir seba ke ez kêneyanê xo binaya serwîsê dibistanî ra mi berê xo akerd û nuşteyê ‘elewîyan rê merg’ û nîşanê reykî dî. La seba ke kênayê mi metersê ez verê berî de vineta. Mi ey serwîsî ra kerdî espar. Ez kena ke fehm bika gelo çi qewemîyeno. Ez û cinîya xo ma elewî yê. Ma bi serran Komela Pîr Sultanî de wezîfe girewt, şaxanê ciwanî de xebitîyayî. Ma taxe û apartmano ke tede ronîşenê de kesêk reyde çirey munaqeşe nêkerdî.
‘Ez do gereyê sucî mekera’
Yalçın Acarî dewamê qiseyanê xo de dîyar kerd ke heta ewro kesî tehdîtêko winasî bi înan nêwendo. Yalçın Acarî, cewabê persa “gelo şima gereyê nê sucî kerd” zî wina da: “Ez tersena ke gereyê nê sucî bikera, ez tersena ke xebere bida polîsan. Emser semtê Yamanlarî yo ke vîstirîya mi tey ronişena de yew serebûto winasî qewemîya. Tayenan galê elewîyan kerd ke înan lînç kerê û polîsî çirey mudaxele nêkerd. Ez tersena ke no serebût bêro mi sere zî. Ez fikirîyena ke polîs do mi mepawo. Coka ez do gereyê sucî mekera. Çîyo zaf balkêş o ke demo ke ma her diyî zî keye de bîme na yewe ameya kerdene. Seke yew ma teqîb bikero û bizano ke ma birapor îme.” ÎZMÎR
