Sosyologo swîsreyij Jean Ziegler yo embazê têkoşînî yê Che Guevarayî û Hetkarê Serekê Heyetê Şewirmendî yê Heqanê Merdiman ê Neteweyanê Yewbîyayeyan (NY) yo, Programê Rojdemê Ewropa yê televîzyonê Medya Haberî de cewab da persanê Serkan Demirelî.
Jean Zieglerî bale ante ser ke sîstemê kapîtalîzmî de zengînî dahîna benê zengîn û feqîrî çend şino dahîna benê feqîr û vat: “Servetê heşt mîlyarderan ê dinya servetê nêmeyê merdimîye ra zafêr o. No hêzê ekonomi û fînansî xeylêk kesan fîneno mîyanê sefelatî û vêşan verdeno. Her panc sanîyeyan de domanêk/e vêşanîye ra mireno/a. Domanê ke mirenî vêşanîye ra mirenî, yenê qetilkerdene. Gerek no sîstemo kapîtalîst bêro rijnayene ke şansê cuye bidîyo feqîran ke hûmara înan ê zengînan ra zafêr a. Ma eşkenê nê bikerê.
Pêkerdişê Lozanî ke sey îxanetê vera kurdan yeno zanayene 100 serrî xo dima verdayî. 1920 de bi Pêkerdişê Sevrî statuyo neteweyî û xoserîye dîyayî kurdan. La mabênê 1920 û 1923 de Fransa û Îngîlîstanî îxanetê nê pêkerdişî kerd û no heqê kurdan destê înan ra girewt. Kurdîstan û şarê kurdî yo ke şaro tewr kahan yê herême bi û wayîrê kulturê tewr zengînî bi mabênê çar dewletan Iraq, Îran, Sûrîye û Tirkîya de ame letekerdene. Na rewşe semedê kurdan destpêkerdişê trajî de bi.
Ez heyranê şarê kurdî ya. Şarê kurdî rixmê îxanetê rojawanijan, zext, merg û zîndanan xover da û nasname, kultur, ziwan û têgêrayîşê xo yê komelkîyî yê sey PKKyî pawitî. Kurdan vera barbarîya cihatkare şero biheybet rayra berd û bi hezaran kurdî semedê pawitişê ma şehîd bîyî. Kurdî do peynî ra tewr peynî ser bikewê û bibê wayîrê Kurdîstanê azadî. Naye ra şikê mi çîn o.
PKK têgêrayîşê xelisnayîşê neteweyî yo. Sey xoverdayîşê fransizan ê vera îşxalê Nazî, têgêrayîşê xelisnayîşê neteweyî yo. PKK de sere de cinîyî şervanê bêters, jîhatî est ê. Mesele Rojawan de xeyrê şervananê kurdan komelo demokratîk ame afirnayene. No semedê heme dinya modelêk o. Xora hepskerdişê Abdullah Ocalanî skandelêk o. Zextê Tirkîya yê vera kurdan sûc o. Tirkîya têna şervananê qehremanan ê PKKyî nê şarê sîvîlî yê kurdan zî qetil kena. Na rewşa bi paştdayîşê rojawanî dewam kena. Gerek welatê rojawanî şirê Tirkîya ser ke wa heqanê kurdan ê demokratîkan bido ci la ê herinda nê de paştî danê ci. Tirkîya endama NATOyî ya. Coka rojawan vera kerdişanê ci bêveng o. No zî yewna îxanetê rojawanî yê vera kurdan o.
Vera Rojawanî hêrişî yenê kerdene, vera kurdan çekê qedexeyî yenê şuxulnayene û la rayapêroyîya mîyanneteweyî bêveng a. Çîyo wînayên nîno qebulkerdene. Tênaverdayîşê kurdan skandal o. Kurdî ewro têkoşînê enternasyonalîstî yê CHEyî kene. Eke CHE ewro biciwîyayêne paştî dayêne kurdan. Caardişê vera Abdullah Ocalanî sûcê vera merdimîye yê. Abdullah Ocalan raybero meşrû yê kurdan o. Gerek komelê mîyanneteweyî wirzo payan ser azadîya Abdullah Ocalanî biwazo. Gerek Ocalan têna sey Rayberê PKKyî nê sey Rayberê meşrûyî yê kurdan zî bêro qebulkerdene.”
