Ji 11 jinên li duh Meletiyê hatin binçavkirin 5 jê îro piştî îfade dan dozgeriyê, hatin berdan. 6 jinên din jî hêj di bin çavan de ne. HDP’a Meletiyê têkildarî mijarê daxuyanî da û diyar kir ku endamên wan bi awayekî derhiqûqî hatine binçavkirin
Di çarçoveya lêpirsîna navend Meletî de, duh li Meletiyê 11 jin hatibûn binçavkirin. Ji jinên hatin binçavkirin hevseroka ESP’ê ya Meletiyê ya berê Ayşe Işik, Rêvebera Komeleya Çanda Pîr Sûltan Abdal (PSKD) Sayîme Tuncel, Hatîce Zengîn, namzeta parlamentera HDP’ê ya berê Betûl Kurnaz Kiliç û endama HDP’ê Gule Dogan îro derxistin Edliyeya Meletiyê. Ayşe Şakar ku li Stenbolê hatibû binçavkirin jî bi rêya SEGBÎS’ê îfade da dozgeriyê. 5 jinên ku li dozgeriyê îfade dan hatin berdan.
Li hêla din jî hevseroka HDP’ê ya berê Fatma Alataş, hevseroka berê ya Partiya Herêmên Demokratîk (DBP) Reyhan Bakir, rêvebera PSKD’ê Hatîce Zengîn, rêvebera DBP’ê ya berê Hatun Aydin, rêvebera HDP’ê ya Meletiyê ya berê Zeynep Dogan û endama HDP’ê Sevgî Çinar jî li Meletiyê hê jî di bin çavan de ne.
HDP: Em ê tu caran serî netewînin
Têkildarî mijarê HDP’a Meletiyê daxuyaniyek da. Hevserokê HDP’ê yê Meletiyê Kemal Gedîk di daxuyaniyê de diyar kir ku tu aliyê hiqûqê yê binçavkirinê nîne û wiha domand: “Beriya kongreya me, 11 siyasetmedarên jin hatin binçavkirin. Dixwazin bi vê yekê HDP’ê bitirsînin. Ev polîtîkaya têkbirinê ye. Em ê tu carî serî netewînin. Gelek hevalên me hatin binçavkirin. Ev hiqûqî nîne.” MELETÎ
