Ji bo azadiya Rêberê Gelê Kurd Abdullah Ocalan kurdên li bajarê Koln ê Almanyayê dijîn name ji Neteweyên Yekbûyî (NY) re şandin. Kurd bi wêneyên Ocalan li ber postaxaneyê li hev civiyan û bi dorê name avêtin qutiya postê. Piştre jî wêneyek bi hev re kişandin.
Yek ji beşdarên kampanyaya şandina nameyan li ber postaxaneyê axivî û wiha got: “Em kurdên li Kolnê dixwazin ku ji bo azadiya Rêberê xwe pênc hezar îmzeyan bişînin. Kampanya li tevahiya Ewropayê dewam dike. Em dixwazin bandorê li Neteweyên Yekbûyî bikin. Em hêvîdar in ku ev kampanya ji bo girtiyên siyasî û gelên bindest bibe serketinek.”
Kampanya beriya niha bi demekê ji aliyê Koma Xebatê ya Kurd a Afrîkaya Başûr (KHRAG) û Konfederasyona Sendîkayan a Afrîkaya Başûr (COSATU) ve ji bo azadiya Rêberê Gelê Kurd Abdullah Ocalan hatibû destpêkirin. Ji her devera cîhanê kurd tevî dostên xwe tev li kampanyayê dibin. KOLN
