Navenda Nûçeyan
Hevseroka bajarokê Til El Şayir a Deşîşa ya li başûrê Kantona Hesekê Seda Feysel El Hermas û cîgira wê Hind Letîf El Xidar 22’ê çileyê ji aliyê çeteyên DAIŞ’ê ve hatibûn revandin û bi rengekî hovane hatibûn qetilkirin. Rêxistina Jinan a PYD’ê ya li Ewropayê-Rojava têkildarî qetilkirina her du jinan daxuyaniyeke nivîskî weşand.
Di daxuyaniyê de hat bibîrxistin ku di demekê de ku artêşa dewleta tirk a dagirker û çeteyên wê bombeardûmanê li herêmên Şehba û Til Rifatê dike, ev êrîşa hovane pêk hatiye û hat ragihandin ku ev êrîşkarî jî nîşan dide, êrîşên DAIŞ’ê û dagirkeriya dewleta tirk du aliyên yek diravî ne.
Di daxuyaniyê de pêşengiya jinan a li nava Rêveberiya Xweser hat bibîrxistin û êrîş û sûcên bi taybetî li dijî jinan tên kirin, şermezar kir.
Di daxuyaniyê de hat destnîşankirin ku jin bi îrade û têkoşîna xwe hewl didin krîza li Sûriyeyê çareser bikin û bingehekê ji demokrasiyê re deynîn, lewma dibin hedefa êrîşên bi vî rengî.
Her wiha di daxuyaniyê de sersaxî ji malbatên sivîlên li Til Rifet û Şehbayê hatin qetilkirin û ji bo çalakiyên 27’ê Çileyê yên li tevahiya Ewropayê bi pêşengiya Rêxistina Jinan a PYD’ê û Tevgera Jinên Kurd a li Ewropayê (TJK-E) bên lidarxistin, banga tevlibûnê hat kirin.
