Hêzên Ked û Demokrasiyê ji bo xwendekara zanîngehê Gulistan Doku û bûyera tecawîzkirina 15 zarokan a li Pêrtagê, sibe saet di 10.00’an de li Qada Seyîd Riza mîtîngê li dar bixin
Hêzên Ked û Demokrasiyê yên li Dêrsimê ji bo xwendekara Zanîngeha Dêrsimê Gulistan Doku ku ev 12 roj in winda ye û ji bo bûyera tecawîzkirina 15 zarokan a li navçeya Pêrtagê, dê sibe mîtîngê li dar bixin. Mîtîng dê sibê saet di 10.00’an de bi dirûşma ‘Em ê rê nedin dejerebûnê. Em ê xwedî li bajarê xwe, zarokên xwe, pêşeroja xwe û li xwe xwedî derkevin’ li Qada Seyîd Riza bê lidarixistin.
Têkildarî mijarê seroka Şaxa Konfederasyona Sendîkaya Karkerên Şoreşger (DÎSK) a Dêrsimê Şukran Yilmaz axivî û da zanîn ku li Dêrsimê di demên dawî de bûyerên tecawiz, tacîz û hwd. zêde bûne û wiha got: “Weke mînaka tecawîz û tacîza zarokan û windakirina Gulistan Doku. Li dijî van bûyeran divê em îro bêdeng nemînin. Ger em bêdeng bimînin, em ê pêşiya pêşeroja civakê jî bigirin. Ji ber vê, mîtînga ku em ê li dar bixin, pir girîng e. Em dixwazin hemû kes beşdarî mîtîngê bibin.”
Yilmaz wiha bi dawî kir: “Dê Baroya Dêrsimê, Partiya Demokratîk a Gelan (HDP), Partiya Gel a Komarê (CHP), Federasyona Gelan a Demokratîk û hemû beşên civakî jî tev li mîtîngê bibin.” DÊRSIM
