Koma Xwendinê ya Taksîmê bi navê ‘Lavlavk’ hesabekî blog vekir û têkildarî pirtûkên kurdî nivîsan diweşîne. Endamê komê Heno Ronak diyar kir lavlavk gihayeke evîndariyê ye û ji ber evîndariya xwe ya kurdî navê bloga xwe danîne lavlavk
Li gel hemû zehmetî û astengiyên dewletê jî eleqeya ji bo zimanê kurdî zêde dibe. Bi bername û xebatên cûda li wêjeya kurdî xwedî tê derketin. Di vê çarçoveyê de di navbera salên 2015 û 2019’an de ji ber girtina gelek sazî û dezgehên kurdî, li bakurê Kurdistanê û Tirkiyeyê gelek ‘Komên Xwendinê’ hatin avakirin. Ji ber ku cihekî sabît ê koman tuneye, bi awayekî gerok her carê li cihekê li hev kom dibin û bernameya xwe li dar dixin. Di van koman de pirtûkên kurdî tên xwendin û li ser naverok û zimanê pirtûkan nîqaş tên kirin.
Yek ji van koman jî Koma Xwendinê ya Taksîmê ye ku li bajarê Stenbolê yê Tirkiyeyê hatiye avakirin. Kom di tebaxa sala 2018’an de hatiye avakirin û heftê carekê li hev kom dibe û berhemên wêjeya kurdî dixwîne û li ser wan nîqaşan dike. Koma ku nêzî salekê ye li hev kom dibe û pirtûkên kurdî dixwîne, di dawiya meha adarê de bi navê ‘Lavlavk’ hesabekî blog vekir û xebateke balkêş da destpêkirin. Endamên komê derbarê her xwendina xwe de nivîs binivisînin û dê li ser ser blogê biweşînin.
Rojen şemiyan li hev kom dibin
Wek destpêk endamên komê derbarê nîvîskarê kurd Erebê Şemo û bi ser navê ‘Mêtrîka Romana Kurdî’ berhema wî ya bi navê ‘Şivanê Kurmanca’ ku wek romana yekemîn a kurmancî tê qebûlkirin, nivîsek weşandine. Di nivîsê de bi kurtasî jiyana Erebê Şemo hatiye vegotin û her wiha qala naveroka Şivanê Kurmanca hatiye kirin. Endamê komê H. Ronak ku me xwe bi rêya medya civakî gihandê, têkildarî kom û blogê agahî da û diyar kir ku koma wan komeke pirdeng e û hejmara koma wan li gorî xwîneran diguhere.
- Ronak da zanîn ku bi kom û bloga ku ava kirine dixwazin bi kêrî wêjeya kurdî bên û wiha got: “ Din av koma me de xwendevan, karker û mamosteyên kurdî hene. Em her heftê rojên şemiyan li hev dicivin û pirtkûkeke kurdî dixwînin û li gorî rê û rêbazên wêjeyî, hunerî, cîhanî û kevneşopî dinirxînin. Ronak têkildarî navê Lavlavk ê bloga wan jî ev tişt anî ziman: “Lavlavk gihayek eşqê ye. Eşqa me jî pêşîyê ziman û hunera kurdî ye. Ku lavlavk xwe bi cihekî ve bipêçe bi eşqî dikeve rêwîtîyeke berfireh û bi bandor. Lavlavka me jî di nav ziman û hunera kurdî da şîn bûye.
Armanc agahdarkirina wêjeya kurdî ye
Ronak herî dawî destnîşan kir ku ew bi avakirina kom û bloga xwe armanc dikin ku xwînerên kurdî bi nivîsên wan ji wêjeya xwe agahdar bin û wiha dawî li axaftina xwe anî: “Gelek xwînerên kurdî ji hev dûr in û nikarin li cihekî bicivin, me jî ji bo ku vê pirsgirêkê çareser bikin blog vekir da ku fikrên me li cihekî kom bibin û rastîyeke wêjeyî derxine holê. Heta ku ji destên me bê em ê nivîsan berdewamî bidomînin. Pirtûkên ji aliyê nirxandinê ve kêm mabin jî, em dikarin bi awayekî din bigihînin kesên ku pêwîstîya wan pê hebe.”
Kesên ku bixwazin nivîsên li ser Lavlavkê hatine weşamdin bixwînin dikarin li ser vê malnîşanê xwe bigihînin nivîsan; http://lavlavk.wordpress.com
