Însiyatîfa Gel a Kantona Efrîn û Şehba ji bo şermezarkirina tecrîdê û misogerkirina azadiya fîzîkî ya Rêberê Gelan Abdullah Ocalan li gundê Babinisê meşek organîze kir. Di meşê de bi hezaran xelkê herêmê beşdar bû.
Meş ji çarêya gundên Babinis û Til Şiîrê dest pê kir. Di meşê de wêneyên Rêber Apo, pankarta ˊEy Serokê me tu yî roja meˊ hatin hildan û bê navber dirûşmên ji bo azadiya fîzîkî ya Rêber hatin berzkirin.
Li stadyûma gundê Babinisê, meş vegerî mîtîngê. Li wir endama rêveber a Kongra Star Ruweyde Ehmed tecrîd şermezar kir û got: “Em heta pêkanîna azadiya fîzîkî ya Rêber Abdullah Ocalan têkoşîn û berxwedanê dewam dikin.”
Her wiha Ruweyde bang li rêxistinên hiqûqî yên cîhanê kir ku li hember tecrîda li ser Rêber Abdullah Ocalan bi berpirsiyariyên xwe rabin.
Endamê Însiyatîfa Gel a Efrîn û Şehba Nacî Selame axivî û got: “Li ser Rêbertî komployeke mezin hat meşandin. Her wiha dewleta tirk a dagirker tevahî qanûnên navneteweyî bin pê dike.”
Selame hevgirtina pêkhateyan bi fikra Rêber Abdullah Ocalan re li dijî êrîşên li ser herêmê silav kir.
Meş bi dirûşmên şermezarkirina tecrîdê û banga misogerkirina azadiya fîzîkî ya Rêber Apo bi dawî bû.
