Navenda Nûçeyan
Di Hilbijartina Xwecihî ya 31’ê adara 2019’an Namzetê HDP’ê Selçûk Mizrakli ji sedî 62.93 dengên bajêr wergirt û bû Hevşaredarê Bajarê Mezin a Amedê. Di 19’ê tebaxa 2019’an de qeyûm tayînî şûna Mizrakli hat kirin. Mizrakli li ser îfadeyên îtîrafkar Hîcran Berna Ayverdî di 22’yê cotmeha 2019’an de bi îdiaya “endamê rêxistinê ye” hat girtin. Mizrakli niha li Girtîgeha Bunyana Kayseriyê ya Jimara 2’yan a Tîpa T tê ragirtin.
Darizandina Mizrakli 5 mehan berdewam kir û dadgehê bi heman îdiayê 9 sal û 4 meh û 15 roj cezayê zîndanê lê birî. Ji bo Mizrakli serbest were berdan kampanyaya îmzeyan hat destpêkirin. Ev kampanya ji aliyê Koma Kampanyaya Azadiyê li ser malpera Change.org ve tê birêvebirin. Komê banga bi sernavê “Danişînên Siyasî yên Şerma Giran ên li Tirkiyê rawestînin” belav kir.
Bang li Ewropa û Amerîka hat kirin
Di bangê de ji civaka demokratîk a navnetewî û her wiha ji rêveberiyên wek Neteweyên Yekbûyî, Yekîtiya Ewropayê û rêveberiya Joe Bîden ê Serokê Amerîkayê yê hilbijartî hat xwestin ji bo siyasetmedarên kurd ên girtî û tên darizandin bêdeng nemînin û ji bo berdana wan bikevin nava hewldanan.
Lînka kampanya îmzeyan wiha ye:
