Navenda Nûçeyan
Li Skoçyayê ku li nava Qraliyeta Yekbûyî herêmeke xweser e, piraniya xelkê herêmê di referandûma Brexîtê de ya ji bo derketina ji nava Yekîtiya Ewropayê, dengê ‘na’ dabû.
Piştî ku Brexît di sala 2016’an li gelemperiya Qraliyeta Yekbûyî hate qebûlkirin, li Skoçyayê nêrîna ji bo serxwebûnê êdî zêdetir bû.
Piştî ku 24’ê kanûnê roja pêncşemê peymana li ser bazirganiya bi Yekîtiya Ewropayê re hate qebûlkirin, serokwezîra Skoçyayê ya alîgirê serxwebûnê Nîcola Stûrgeon got, “Êdî dema serxwebûnê ye.”
Stûrgeon diyar kir ku êdî dem hatiye Skoçya bibe yek ji ‘neteweyên serbixwe yên Ewropayê’ û got, “Ti peyman nikare tişta ku Brexîtê ji me stand vegerîne. Êdî dem hatiye ku weke neteweyeke serbixwe ya Ewropayê em paşeroja xwe bi xwe diyar bikin.”
Stûrgeon hefteyên derbasbûyî gelek caran anîbû ziman ku referandûma serxwebûnê ya nû divê sala 2021’ê teqez bê kirin. Lê belê London xwe nade ber vê yekê.
Di sala 2016’an de ji sedî 62 ê şêniyên Skoçyayê ji bo mayina li nava Yekîtiya Ewropayê dengê ‘erê’ dabûn, lewma tê zanîn ku eger referandûma serxwebûnê bê kirin wê bê qebûlkirin.
Skoçya ku nifûsa xwe 5.5 milyon mirov e û xaka wê jî 79 hezar km çargoşe ye, yek ji sê parên xaka Brîtanyayê ye.
