Navenda Nûçeyan |
43 baro, rêxistinên mafê mirovan ên bakurê Kurdistanê, Tirkiye û cîhanê ji bo ku balê bikişînin ser rewşa tenduristiyê ya siyasetmedara kurd Aysel Tugluk ku ji 28’ê kanûna 2016’an û vir ve girtiye, bi daxwaza lezgîn name ji komên xebatê û raportorên NY’yê re şandin.
Name ji Raportorê Taybet ê Dijî Îşkence û Tehdeyê ya NY’yê, Raportorê Taybet ê Dadger û Parêzerên Serbixwe, Raportorê Rewşa Parêzvanên Mafê Mirovan, Koma Xebatê ya Girtinên Kefî, Raportorê Taybet a Mijara Tenduristiya Zîhnî û Raportorê Taybet a Heqê Kêmaran re hat şandin.
Di nameyê de binpêkirina mafan a li girtîgehan û rewşa Tugluk hat destnîşankirin û hat diyarkirin ku piştî ku teşhîsa demansê li ser Tugluk hatiye danîn rewşa wê girantir bûye û wiha hat gotin: “Aysel Tugluk li gel nexweşiya giran jî di şertên berdest ên girtîgehê û dema hêla Covid-19’ê de jî li girtîgehê de tê girtin. Ev jî nîşan dide ku saziyên rayedar ne li gorî hiqûqê û standartên navnetewî tevdigerin.”
Divê li dijî binpêkirina mafan a li ser Tugluk tê domandin destwerdaneke bi lezgînî were kirin. Lazim e Tugluk û girtiyên di rewşa wê de demildest bên berdan û destûr were dayîn ku rêxistinên mafê mirovan û derveyî hikûmetê bikaribin problêmên xwegihandina heqê tenduristiyê ya girtî û cezaxwariyan bîni ser ziman, peywirdarên bijîşkî bikaribin bi azadî karê xwe bikin û bikaribin serdana girtîgehên hikûmeta tirk bikin û wan kontrol bikin.”
