Ji şervanên li eniyên pêş ên şer ên Til Temirê Dilxwaz Hesekê dibêje ku wan axa tu kesî dagir nekiriye. Dilxwaz Hesekê wiha didomîne: “Em ê nehêlin dagirker xaka me dagir bikin û zarokên me bikujin. Em ê tu caran paşde gav neavêjin.”
Li hemberî êrîşên qirkirinê yên dewleta tirk a dagirker û komên çete yên girêdayî wê yên DAIŞ, El Nusra û OSO’yê, şervanên Hêzên Sûriyeya Demokratîk (HSD) jî enî bi enî di çarçovaya Berxwedana Rûmetê de têdikoşin û derbên giran li dagirkeran didin.
Yek ji şervanên HSD’ê yên ku li eniyên herî pêş ên navçeya Til Temir a Hesekê li dijî êrîşên qirkirinê li ber xwe dide jî Dilxwaz Hesekê ye. Dilxwaz Hesekê bi rûkenî li kamereyan dinêre û dibêje; ‘Me xaka tu kesî dagir nekiriye. Lê çeteyên artêşa tirk a dagirker hewl didin xaka me dagir bikin û gelê me bikujin. Em ê nehêlin ku kesek xaka me dagir bike.’
Dilxwaz Hesekê destnîşan kir ku artêşa tirk a dagirker û çeteyên wê, hewl didin derbasî herêmên wan bibin û wiha bi dawî kir: “Em bersivên hemû hewldanên wan didin û her carê jî êrîşên wan dişikînin. Berxwedana me ya ji bo rizgarkirina xaka me didome. Em ê tu carî paşde gav neavêjin.” HESEKÊ
