Gerîlayên Azadiya Kurdistanê ji 23’ê Nîsanê ve li dijî êrîşên dagirkeriya dewleta tirk bi berxwedaneke heybet û bi teknîkên gerîlayên serdemê, dîrokê ji nû ve dinivîsin. Gerîlayan li dijî hemû êrîşên giran û çekên kîmyewî jî rê nadin ku leşkerên dagireker û nokerên wan axa Kurdistanê dagir bikin.
Têkildarî berxwedana heybet berxwedêrên Werxelê peyamek ji raya giştî û hevrêyên xwe re şand.
Berxwedêran destnîşan kirin ku dê rê nedin neyaran ku bi hêsanî têkeve nava xaka ku bi xwîna şehîdan hatiye şûştin û gotin ku dê heta dawiyê têbikoşin û bi ser bikevin.
Peyama berxwedêrên Werxelê wiha ye:
“Di vê berxwedanê de; di serî de ji Rêber Apo re, hevalên li zindanan, hevalên dozê re û tevahiya gelê xwe yê bi hezkirin û azadiyê ve dilsoz in, bi vîn û germahiyê silav û hezkirinên xwe dişînin.
Wekî ku hûn jî zanin bi şiyara ku pêşengên me yên destpêkê Mazlum Dogan, Kemal û Xeyriyan berz kirin, ji 23’ê Nîsanê û vir ve li dijî konsepta tunekirina gerîla û tasfiyekirina doza azadiyê, bi pêşengtiya fermandarên me Serhed, Diyana, Bawer û Delalan têkoşîn û berxwedaneke mezin tê meşandin.
Di vê berxwedanê de hemû heval di warê moral û kelecanê de li asta herî bilind e. Di vê berxwedanê de gelek hevalên me heya deqeya xwe ya dawî şer kirin û şehîd bûn. Em jî wek şopdarên doza wan, pêwîst bike heya parçeyê dawî yê hestiyê xwe feda bikin. Û pêwîst bike em ê wek Zîlan li hember neyar bibin fedaiyên jiyanê.
Em rê nadin ku neyar bi hesanî têkeve nav axa ku bi xwînê hatiye şûştin. Em soz didin, bi vî ruh û baweriyê heya bêhna xwe ya dawiyê têbikoşin û bi ser bikevin!” BEHDÎNAN
