Ji rêzeçalakiyên bi rasthatina 25’ê Mijdarê Roja Têkoşîna li dijî Tundiya li ser Jinan a Cîhanê, bi sedan jinên kantonên Efrîn û Şehbayê li gundê Kefer Naya yê Şehbayê meşek li dar xist.
Meş ji naverasta Kefer Naya dest pê kir. Di meşê de alên Kongreya Star, Yekitiya Jinên Ciwan û pankartên ‘Na ji zewicandina zarokan re, na ji destdirêjiya cinsî re, tecawîz sûceke nayê efûkirin’ hatin hiland û durişmên şermezarkirna tundiya li dijî jinan û qetilkirina zarokan hatin berzkirin.
Meş li qada dibistana Kefer Naya veguherî mîtîngê û deqeyeke rêz hat girtin, dûvre li ser navê Yekitiya Jinên Ciwan a Kantona Şehbayê Bedîe Muslim axivî û wiha got: “Bi nêzbûna Roja Têkoşîna li dijî Tundiya li ser Jinan a Cîhanê em Yekitiya Jinên Ciwan sûc û binpêkirinên ji qetilkirin û tecawizê ku li dijî tevahî pêkhateyan pêk tên, her wiha sûcên li dijî zarokan pêk tên şermezar dikin.
Zihniyeta mêrdestî, urf û adet hîn jî bi tevahî cureyên tundiyê li dijî jinan pêk tên, bi taybet jinên ciwan ên bi hincet cuda tên qetilkirin. Ev sûceke dûrî mafên civak û jinan e.
Em jinên ciwan ên kantona Şehbayê li ser fikir û felsefeya Rêber Abdullah Ocalan bi rêxistinkirî ne û soz didin ku em ê her kesê tundiyê li dijî jin û zarokan pêk tînin muhasebe bikin û li kêlek jinan bisekinin û biparêzin.”
Meş bi durişmên şermezarkirina tundiya li dijî jinan û silavkirina berxwedana jinên ciwan bi dawî bû. ŞEHBA
