Meclisa Jinan a Partiya Demokratîk a Gelan (HDP) û Tevgera Jinên Azad (TJA) li navçeya Cizîrê ya Şirnexê, derbarê bûyara çawişê pispor Mûsa Orhan ku li navçeya Qûbînê ya Êlihê tecawizî jina ciwan Îpek Er kiribû û bûbû sedema mirina wê de xwestin daxuyanî bidin çapemeniyê. Polîsan derdora jinan dorbeç kirin û biryara qedexeya walitiyê wekî hincet nîşan dan û nehiştin ku jin daxuyanî bidin. Lê jinan tevî hemû astengiyên polîsan jî daxuyanî dan. Hevseroka DBP’ê Salîha Aydenîz, parlementera HDP’ê ya Şirnexê Nuran Îmîr û rêxistinên navend û navçeyê beşdarî daxuyaniyê bûn. Di daxuyaniyê de dovîzên ‘Ji tundiya li jinê re na’, ‘Qetlîamên jinan polîtîk in’ û ‘berxwedan jiyan e’ hatin rakirin.
Hevseroka HDP’ê ya Cizîrê Gûler Tunç daxuyanî da. Tunç anî ziman ku bi salan e li herêmê polîtîkayên şer ên taybet tên meşandin û wiha got: “Jina ciwan Îpek Er a Mûsa Orhan tecawîzê wê kiribû, duh li nexweşxaneya ku lê tedawî didît, jiyana xwe ji dest da. Dixwazin gelê kurd û erdnîgariya kurd li ser bedena jinê perçe bikin. Ev bi destên polîs û leşkeran tê kirin. Lê em jin, em ê li her qadê li dijî vê hişmendiyê li ber xwe bidin û em ê bêdeng nemînin.”
‘Nirxên civakê tên hedefgirtin’
Tunç destnîşan kir ku yên dixwazin Peymana Stenbolê betal bikin, dibin sedema zêdebûna tundî û êrîşên li ser jinan û ev tişt anî ziman: “Bi êrîşên zayendî nirxên civakî tên hedefgirtin. Mafê zarokan û jinan ji destê wan tê girtin. Bêgûman li dijî van polîtîkayên taybet em jin wê li her derê li ber xwe bidin.”
Piştî Tunç, Hevseroka DBP’ê Salîha Aydenîz jî axivî û ev tişt anî ziman: “Em ê rojekê bi tenê jî kolanan vala nehêlin. Em ê destûr nedin ku hûn bi gotina du kesan xelas bikin. Ji çekên xwe hêz digirin. Em ê destûr nedin ku hûn bi çekên xwe êrîşên zayendî meşru bikin. Tişta ku li Kurdistanê tê meşandin polîtîk e. Divê li dijî van polîtîkayan û êrîşên faşîzan kesek bêdeng nemîne.”
Daxuyanî bi dirûşmeyên ‘Jin Jiyan Azadi’ bi dawî bû.
Li Mêrdîn û navçeyên wê Nisêbîn û Qoserê jî, der barê bûyerê de daxuyanî hatin dayîn. Di daxuyaniyên ku hatin dayîn de, wiha hat gotin: “Hûn çima faîlên êrîşkarên zayendî diparêzin? Hûn bi van polîtîkayan civakê ber bi tunebûnê ve dibin. Em bang li hemû jinan dikin ku li dijî van êrîşan têbikoşin.” ŞIRNEX/MÊRDÎN
