Endamên TJA’yê ji bo ku balê bikişînin ser çalakiya greva birçîbûnê ya Leyla Guven û girtiyan, li rawestgeha Metroyê ya Aksarayê zincîra jiyanê ava kir
Endamên Tevgera Jinen Azad (TJA) ji bo ku balê bikişînin ser çalakiya greva birçîbûnê ya bêdem û bêdorveger a hevseroka KCD’ê û parlamentera HDP’ê ya Colemêrgê Leyla Guven ku di roja 171’emîn didome û çalakiya greva birçîbûnê ya zêdetirî 7 hezar girtiyên di girtîgehên bakurê Kurdistanê û Tirkiyeyê yên ji bo rakirina tecrîda li ser Rêberê Gelê Kurd Abdullah Ocalan, li rawestgeha Metroyê ya Aksaray a Stenbolê zincîra jiyanê ya ‘Deng bide Leyla Guven’ ava kir.
Jinên çalakvan ku maskeyên spî dabûn ber devê xwe, pêşmalkên ku wêneyên Guven ên bi nivîsa ‘Bila tecrîd rabe û Leyla bijî’ li ser bûn, li xwe kirin. Jinên ku zincîreke dirêj ava kirin, bê navber dirûşmên ‘Bijî berxwedana zindanan’, ‘Deng bide Leyla Guven’, ‘Bila daxwazên Leylayê bên qebûlkirin’ û ‘Bila tecrîd rabe û zindan bên valakirin’ berz kirin.
Jinên ku bi tililiyan hewl dan dengê xwe bidin bihîstin bang kirin û gotin; ‘Ji bo bidawîkirina tecrîdê 7 hear girtî di greva birçîbûnê de ne. Gelo agahiya we pê heye?’ STENBOL
