Navenda Nûçeyan |
Çalakiyên jinên meksîkî yên li dijî kuştina Ingrid Ecamilla Vargas ku ji aliyê mêrek ve bi awayeke hovane hatibû qetilkirin, berdewam dikin. Jin li dijî tundiya mêr û siyaseta cînsiyetparêz a Hikûmeta Meksîkayê li ser pêyan in.
Jina ciwan a bi navê Ingris Ecamilla Vargas (25) di 9’ê sibatê de ji aliyê zilamê bi navê Eric Francisco Robledo (45) ku qaşo hezkiriyê wî bû ve hatibû qetikirin. Robledo piştî jina ciwan dikuje şûnde bedena wê parçe dike û hinek dezgehên ragihandinê yên Meksîkayê jî wêneyên bedena ew jina parçebûyî belavkiribûn.
Piştî wê di 20’ê sibatê de zaroka 7 salî Fatima Cecilia Aldrighett piştî ji dibistanê derdikeve, dema li benda dayika xwe dimîne tê revandin û kuştin. Hate gotin ku li ser bedena zaroka 7 salî şopên destdirêjî û derbkirinê hebû. Piştî bûyerê du kesên gumanbar hatibûn binçavkirin.
Piştî van bûyeran jin li dijî zêdebûna kuştina jinan, nedayîna cezayan û nebûna helwesta medyayê daketin qadan.
Jinên li ber dadgeha eyaleta Sonora ya Destûra Bingehîn kom bûn, bi dirûşman nerazîbûn nîşandan. Paşê komek jin ketin hundir û agir bi dadgehê xistin. Jinên çalakvan her wiha wesayîtek aîdê rojnameya La Rensa ku wêneyên jina bedena wê parçebûyî weşandibûn jî dan ber agir.
