Rêxistinên Mafê Mirovan ên Rojhilatê Kurdistanê û Îranê li ser malperên xwe yên fermî ragihandin ku çalakvanên mafê mirovan û yên civaka sivîl ku piraniya wan jin bûn li ber avahiya Dadgeha Sineyê kom bûn û mîtîngek lidar xistin.
Di destê çalakvanan de dowîzên ku li ser hatibûn nivîsandin ‘Ji Jinkujiyê re na’, ‘Êdî bese e’, ‘Êdî tu cihek ji jinan re ewle nîne’, ‘Bes e ji kuştina jinan a bi navê namûsê re’ û ‘Mafên min ên mirovî neyê nîqaşkirin’ hebû.
Her wiha dovîzên ku li ser hatibû nivîsandin ‘Em hemû Faîze ne’ û ‘Em dixwazin qetilkirina Faîze were zelalkirin’ bal kişand.
Faîze Melekî jina 22 salî ye ku roja yekşema borî li bajarê Sineyê ji aliyê bavê xwe ve hatibû şewitandin û ketibû rojeva civakê.
Li wir jinan daxuyaniyek dan û nerazîbûn nîşanî zêdebûna qetilkirina jinan li rojhilatê Kurdistan û Îranê dan û diyar kirin ku ew ji bê helwestiya rayedaran û bi taybetî dadgehan ku kujeran ceza nakin nerazî ne. Di daxuyaniyê de ev tişt hat gotin: “Wekheviya jin û zilam encax bi yekitî û têkoşîna mirovên azadîxwaz û wekhevîparêz a li dijî tevahiya rejîma îslamî û pergala sermayedariyê ya Îranê û pêkanîna serweriya pergala meclisê ya di nav civakê de dikare pêk bê.”
Mîtîng piştî daxuyaniyê bi dawî bû. SINE
