Seke yeno zanayîş şewa 6ê Sibate de merkezê ci qezaya Bazarcixî ya Mereşî de saet 04.17î de girdîya ci 7.7 erdlerzêk gird qewimîya. Erdlerzî ra dima xeylê kêmanî û rîyê îqtîdarî yê raşt vejîyayî raşte. Hetê dewlete ra hetkarî erê û tay ame kerdiş. Tay awanîyê ke hema qet ci de xebate nêameya kerdiş estî.
Hemsereka Fedearasyonê Elewîyan ê Demokratan (FEDA) Hurîye Kabayel derheqê rewşa herêmanê erdlerzî ke elewî tede ciwîyenê de ANFyî rê qisey kerd.
Kabayele, sere de mexdûranê erdlerzî rê şîfa û serweşîye waşte û wina vat: “Ma bi nê erdlerzî dî ke dewlete senî wazena bi hewayêkê sîstematîkî elewîyan çin bikera. Gere şarê ma yê elewî zî ney bivînê. Gere ma wayîrê xo bivejîyê. Elewîyî mecbûr mendê ke her tim xo bipawê û şîyê koyan ra ciwîyenê. Na felakete de dewlete herinda ke hetkarî bikera, hewl dana ke şar uca ra şêro.”
Nika ra dest dayo mal û mulkê şarî ser o
Kabayele behsê ê îdîayan kerd ke, vajîyeno dewê elewîyan ra, êyê ke veng bîyî, sunnîyê selefîyî ameyê bicakerdene û vat: “Her kes zano ke dewlete bi hewayêkê sîstematîkî herêma Mereşî rê zilm kena. Hewl yenao dayene ke a herême veng biba. 1980î de nato ke no yeno kerdene û şarê ucayî pêro ameyê tîya.”
Dewleta tirke erdlerzî kena bahane
Kabayele dewamê qiseykerdişê xo de înan vat: “Herêma ma Terolar de kampê seba 30 hezar însanan nayî ro ke zafîya înan DAIŞij ê, arman kenê ke elewîyî ê cayan biterknê. Dewleta tirke xora planê naye kerdbî û nika zî erdlerzî kena bahane ke şar uca ra bivejîyo dest bidê mal û mulkê elewîyan ser o. Sey 1980î.”
Elewîyî ke Ewropa de yê gere hetkarîya mexdûranê ma bikerê
Hurîye Kabayele dîyar kerd ke bi rayberîya FEDA û MARDEFî kampayaya înan dewam kena wina vat: “Seke mi verê zî vatbî, tîya şar tena Mereşî rê ney, heme cografyaya elewîyan rê wayîr vejîya. Kampanyayê ma dewam kenê û sewbîna ma xeylê sazgeh û karsazan reyde têkilî de yê. Ma hewl danê ke ê herêman ra cayêko xeta fayî nêşina, uca de konûtî bidê viraştene û şarê xo uca de bi ca bikerê. Hêvî kena ma bieşkîyê bikerê. Gere ma şarê xo yê herême rê hetkarî bikerê ke kulturê xo bipawê.”
