Endamê Komîteya Rayberdişî ya PKKyî Duran Kalkanî bernameyê taybetî yê Medya Haber TVyî de çalakîyê gerîlayan ê Zap û Metîna ercnayî.
Ercnayîşê Kalkanî wina yê:
”Tecrîdê vera Rayber Apoyî dewam keno. Nê prosesî de 10ê teşrîna verêne de Hemleya ‘Abdullah Ocalanî rê azadîye, Meseleya Kurdan rê Çareserîye’ dîyabî destpêkerdene. Pêro dinya de şarî bi xurtî wayîrê na hemle vejîyenê, her ca de aktîvîte û çalakîyê pîlî yenê kerdene. Nika zî zîndanan de seba azadîya Rayberîye seba na hemle grevê vêşanîye est o. Ez embazanê zîndanan û çalakîya înan selam kena. Serrgêra ronîyayîşê partîya ma de zî waştişo verên azadîya Rayberîye bi. Her ca ra seba azadîya Rayber Apoyî vengî berz benê. La ganî na hemle hîna zaf bêra pîlkerdene.
Partîya ma PKK kewte serra 46ine. PKK her serre hîna beno pîl û xurtêr beno. Serra 45. ya partîye de zî serkewtişê pîlî ameyî dîyene. Ma serra 45ine de sibate de erdlerzî ra semed bira çalakînêkerdişî girewtbî û dima na bire heta weçînayîşan derg kerde. La dewleta îşxalkere rixmê ney zî hêrişanê xo rê bêmabên dewam kerd.
Weçînayîşan ra dima seba ke dewleta tirke hêrişê xo kerdî giranêr gerîlayan zî şer vilayê her cayî kerd. Seke zanîyeno Anqara de verê Wezîrîya Karanê Zereyî de embazanê ma Rojhat û Erdalî çalakîyêka fedayîye kerde. A raşte na çalakîya hêzê gerîlayan mojnaye.
PKK 45 serrî verî hetê komêka qije ra ronîyabi. Ewro PKK bîyo têgêrayîşêko global. Emser bi taybetî şayîyan de ma dî ke serra 46ine de têkoşîn do pîlêr bibo. Têgêrayîşê ma bi hêzê Hemleya 10ê Teşrîna Verêne, serkêşîya cinî û ciwanan de do AKP-MHPyî bin bivisno.
Tewr zaf gerîlayan serra 45. ya PKKyî bi hawayêkê ercîyayeyî fîraz kerde. Gerîlayan bi Operasyonê Şorişgêrî yê Şehîde Leyla Amed Sorxwîn ê Metîna û çalakîyanê Zapî derbê giranî dayî artêşa tirke ro û kewtî serra 46ine. Gerîlayan bi nê çalakîyan serra 46. pêşwazî kerde. Xora çalakîyê Zap û Metîna mojnenê ke çalakîyê serra 46. ya PKKyî do senî bibê. Ez pêro embazanê ke tewrê nê çalakîyan bîyê zerrî ra fîraz kena û embazan rê serkewtiş wazena.
Vera şarê ma, têgêrayîş û partîya ma teda û hêrişî dewam kenê. Ganî nê prosesî de ma xo hîna zaf rêxistin bikerê, bi xurtî û topyekûnî verê faşîzmî bigêrê.” BEHDÎNAN
