Endamê Komîteya Rayberdişî ya PKKyî Duran Kalkanî beşê diyînî yê roportajê xo de qala xoverdayîşê Îmraliyî yê Rayberê Şarê Kurdî Abdullah Ocalanî kerde.
Qiseykerdişê Kalkanî ra tay noqtayê girîngî wina yê:
”Rayber Apoyî 25 serrî yo Îmrali de xoverdayîşêko pîl kerd û uca xo rê kerd merkezêkê berardişê teorîkî. Rayber Apoyî Îmrali de şorişo entelektuel kerd, paradîgmayêka newîye afernaye. Ganî ma sey şorişgêran xoverdayîşê Rayber Apoyî rind fam bikerê. Ganî ma şoriş û fikranê ey ser o şorişê xo awan bikerê.
Hêzê komplogerî pê Rayber Apoyî nêeşkayî. Coka înan hêrişê Komployê Mîyanneteweyî kerd. Komplogeran sîstemê Îmraliyî amade kerd û Tirkîya zî kerde gardîyana Îmraliyî. Rayber Apoyî seba ke komplogeran teşhîr bikero. Ey nê esasî ser o pawitişnameyê xo kerdî.
Tay kesan vatêne ‘Vera komployî têkoşîn do nêro kerdene.’ Mîyanê ma de zî tay kesan wina vatêne. La Rayberîye vat: ”Ez do têkoşer a. Wa mi rê paştî bêra dayene.’ Têgêrayîşê ma û şarê ma destek da. Rayber Apoyî ra bawer kerd. Axir Rayber Apoyî zîndan de formulê xo viraştî, paradîgmaya xo awan kerde û komplo serî ra heta binî ercna.
Rayber Apoyî bi xoverdayîşê xo yê Îmraliyî bi rayberê şaran. Ey seba şarê kurdî ferasetêko newe aferna. Bi taybetî paradîgmaya ey a neteweya demokratîke, ekolojîke û azadîgîrîya cinîyan mîyanê cinî û ciwanan de hişmendîyêka newîye û rêxistinîya azadîye awan kerde. Rayber Apoyî Jineolojî afernaye û pêşkêşê cinîyan kerde.
Ganî ma fam bikerê ke Rayber Apo senî 25 serrî yo senî Îmrali de xo ver dano. Seba têkoşînê azadîye yê Kurdîstanî û têkoşînê demokrasîyî yê Tirkîya û dinya ganî xoverdayîşê Îmraliyî hol bêro famkerdene. Xoverdayîşê Îmraliyî yê Rayber Apoyî vernîya ameyoxê welatî roşnî kerde. Rayber Apoyî Îmrali de meseleya kurdan daye zanayene, Hemleya 15ê Tebaxe daye şinasnayene û şarê kurdî rêxistin kerd.
Komplogeran vatêne qey ê do Rayber Apoyî îmha bikerê. Sîstemê Îmraliyî sîstemêko winayên o ke roje de eşkeno 10 reyî merdimî bikişo. La ha yo 25 serrî yo Rayber Apo vera sîstemê Îmraliyî xo ver dano. No çita mojneno? Sîstemê Îmraliyî eşkeno bêro parçekerdene, azadîya Rayber Apoyî eşkena bêra caardene. Bi ney biawer bikerê.
Nika na menga komployî de asta dinya de seba azadîya Rayber Apoyî têkoşîn yeno kerdene. Şarê ma, dostê ma, têgêrayîşê ma û merdimatîye her ca de payan ser de yê. Rayber Apoyî vatbi ’15ê sibate roja reş a.’ La ewro têkoşînê azadîya seba Rayber Apoyî roşnîye vila keno. Ez pê bawer a ke serrgêra 25ine ya 15ê sibate de ferasetê komplogeran do bêro çinkerdene. Ez venga pêro kesan danê ke seba ney 17ê sibate de verê xo bidê Kolnî. Wa her ca de seba azadîya Rayber Apoyî çalakîyê xurtêrî bêrê kerdene. Serkewtiş do ê xoverdayoxan bibo.” BEHDÎNAN
