Endamê Komîteya Rayberdişî ya PKKyî Duran Kalkanî bernameyê taybetî yê Medya Haber TVyî de rojdem ercna.
Qiseykerdişê Kalkanî ra tay noqtayê girîngî wina yê:
”Tecrîdê Îmraliyî serra 25. de yo. Rayber Apo seba ke azadî û heqanê kurdan paweno 25 serrî yo yeno tepiştene. 10ê teşrîna verêne de Hemleya ‘Rayber Apoyî rê Azadîye, Meseleya Kurdan rê Çareserîye’ dîyabî destpêkerdene. Na hamle zaf girîng û manadar a. Na hemle mojnena ke têkoşînê seba azadîya Rayber Apoyî fikranê ey reyde vila bena. Azadîya Rayber Apoyî her kesî eleqedar kena. Xora ewro têkoşîn dormeyê Rayber Apoyî de yeno rêxistinkerdene. Rayber Apo vera sîstemê tecrîd û îşkenceyî yê Îmraliyî 25 serrî yo têkoşînêkê bêhempayî keno. Rayber Apo serkêşê têkoşînê vera faşîzmî yo. Serkêşê bînî zî cinî yê. Cinîyî seba azadîya xo têkoşînê azadîya Rayber Apoyî de cagênê.
Azadîya Rayber Apoyî do çareserîya meseleya kurdan, azadîya kurdan û demokrasî xo de bîyara. Ganî Hemleya ‘Rayber Apoyî rê Azadîye, Meseleya Kurdan rê Çareserîye’ pêro Rojhelatê Mîyanênî û dinya ra bêra vilakerdene. Ganî şarê Tirkîya seba demokratîkbîyayîşê welatî paştî bidê na kampanya. Ganî tewr zaf şarê filîstînî û musewîyan wayîrê fikranê Rayber Apoyî vejîyê. Çunke çareserîya meseleya şaran fikrê Neteweya Demokratîke de ya.
Şerê gerîlayan serkêşîya YJA-Starî de dewam keno. YJA-Star têkoşînêkê tarîxî keno û mojneno ke îradeyê cinîyan çend xurt o. Teşrîna verêne de vera dişmenî çalakîyê girîngî ameyî kerdene. Artêşa tirke teng bîya û xo peyê PDKyî de nimnena. PDK û dewleta tirke hemkarê yewbînan ê, sey yew artêşe têgêrenê. Dişmen Herêmanê Pawitişî yê Medya û Vakur de hêrişanê giranan rê dewam keno. La heta ke nê hêrişî dewam bikerê xoverdayîşê gerîlayan zî do dewam bikerê.
Komara Tirkîya kewta serra 100. Ganî serrgêra 100. de dewlete kerdişanê xo de bêra têrî. Kurdî tirkan ra zêdeyêr bi des hezaran serrî yo nê erdan de yê. Ganî dewlete hînî estbîyayîşê kurdan înkar nêkera û qirkerdişê kurdan ra fek vera bida.
Gazze de qirkerdişêko yeno kerdene. Erdogan meseleya Filîstînî de durist nîyo. Ma sey têgêrayîşê azadîye tim hetê dewaya şarê Filîstînî de yê. Îsraîl vera Gazze bi her hawayî hêrişî keno. La meseleya Filîstînî pê şîdet û şerî ney pê paradîgmaya neteweya demokratîke ya Rayber Apoyî çareser bena.
Dewleta tirke bi bahaneya çalakîya fedayî ya Anqara hêrişê Rojawanî kena. La hetê bînî ra Erdogan Îsraîlî rexne keno. Erdoganê mîtîngê Filîstînî yê Îstanbulî de îtîraf kerd ke o endamêkê Hamasî yo. Erdoganî bi xo verê Hamasî da Îsraîlî. Senî ke 15ê êlula 2015î de DAIŞ wexto ke ver bi Şamî şîyêne Erdoganî verê DAIŞî da Kobanê verê Hamasî zî da Îsraîlî. Erdogan keno ke şerî geş bikero, menfaetanê xo bido caardene. La seba ke Hamas ho bin keweno Erdogan nika wayîrê ci vejîyeno. Êyê ke paştî danê Hamasî hemkarê qirkerdişê Îsraîlî yê vera Gazze yê. Eke Tirkîya nê îqtîdarê faşîstî ra xo nêxelisna dore do bêra ci û seba ke Tirkîya nê faşîstan ra bixelisa ganî meseleya kurdan çareser biba.
Konferansê Ciwananê Dinya do bêro kerdene. Ez venga pêro ciwananê kurdan dana ke bi xurtî tewrê nê konferansî bibê. Ciwanî ameyoxê ma yê. Seke Rayber Apoyî vatbi ‘Ma bi ciwanan dest pêkerd, bi ciwanan do ser bikewê.’ Ganî ciwanê kurdî mesuldarî û erkê nê vateyî bîyarê ca, xo rêxistin bikerê.”
