Endamê Komîteya Rayberdişî ya PKKyî Duran Kalkanî bi wesîleya Komployê Mîyanneteweyî yê 9ê Teşrîna Verêne ANFyî rê qisey kerd.
Beşê diyînî yê roportajê Kalkanî ra tay noqtayê girîngî wina yê:
“Rayber Apoyî tim xo rê têkoşîn û xoverdayîş kerd esas. Komployî ra verî zî vera ey hêrişî ameyî kerdene la ey nê hêrişî pûç kerdî. O tim baldar bi. Ey tim çareserîya meseleya kurdan ser o xîret kerd. Ey 1976 ra dima dest pê ercnayîşan kerd, kêmasî û xetayî safî kerdî û Hemleya 15ê Tebaxa 1984î wina dabî destpêkerdene. Ey planê hêrişî yê 1987-88î wina pûç kerd, 1992 de hêrişê hewayî pûç kerd, adara 1993yî de îlankerdişê adirbirnayîşî reyde verê sîyasetê demokratîkî akerd, ey 1ê êlula 1998î de reyna adirbinayîş îlan kerd. Rayber Apoyî nê çîyî pêro seba çareserîya meseleya kurdan kerde. Rayber Apoyî seba ke Ewropa meseleya kurdan afernabî seba çareserîya ci bire dabî ke şoro Ewropa. A raşte o fikirîyayêne ke bêro welat zî la seba ke şertî sey verî nêbîyî bire daye ke şoro Ewropa.
98 de zî şîyayîşê Ewropa zehmet bi la Rayber Apoyî pêro zehmetî girewtî xo çiman û vejîya teber. O wexto ke Yunanîstan de reya verêne raşte astengîye zî ame cade anêgêra û şi Rûsya. Bi nê hawayî zî îmhaya 9ê Teşrîna Verêne asteng kerde.Prosesê Roma de ey Ewropa rê çareserîya meseleya kurdan ferz kerde. Tedayan ser o Rayber Apo neçare mendo ke Roma ra vejîyo û bi nê hawayî zî heto negatîf ê prosesî dest pêkerd. Dima pê kayan Rûsya de Rayber Apo gêrîya binê kontrolî û Rûsya û Kenya de zî hêrişê îmhakerdişî ameyî kerdene. Rayber Apoyî no proses bi baldarî îdare kerd û komplo pûç kerd. Komployê 15ê Sibate nê esasî ser o ame kerdene. Prosesê 15ê Sibate de warê ci yê têgêrayîşî amebi tengkerdene, têkilîya ey a bi her cayî amebî qerifnayene.
Rayber Apoyî bi sereyê xo teyna vera Komployê 9ê Teşrîna Verêne têkoşîn kerd. Dima ke Rûsya ra vejîya ey venga şarî da, komplo deşîfre kerd. Şar bi taybetî Ewropa de vejîya waran û wayîrê Rayberîye vejîya. Dima çalakîyanê ‘Şima nêeşkenê tîja ma tarî bikerê’ dest pêkerd. 4 mengî komplo ame pûçkerdene. Heta 15ê Sibate verê komployî ame girewtene. A raşte eke prosesê 9ê Teşrîna Verêne hîna hol biamayêne îdarekerdene û nêameyêne verdayene ke Rayberîye şar û têgêrayîşî ra cîya biba verê Komployê 15ê Sibate do biameyêne girewtene. Heyf ke nê prosesî de têkilîya mabênê Rayber Apoyî û şar û têgêrayîşî ameye qerifnayene. Têgêrayîşî tay kêmasî û xetayî kerdî. Rayber Apoyî zî na rewşe sey ‘dostanîya sexteyîne û embazîya kême’ pênase kerde.
Amerîka 15ê Sibata 1999î de Rayber Apo teslîmê Tirkîya kerd û waşt ke o bêro dardekerdene. Amerîka seba ke Tirkîya paştî bida îşxalê Iraqî bi nê bedelî Rayber Apo dabi Tirkîya. Çunke Amerîka tersayêne ke Iraq de PKK do nêverdayêne ke Amerîka îşxalêk bikera. Xora Tirkîya dima no soz nêard ca û Amerîka zî Iraq de tewreyî kerdî sereyê leşkeranê tirkan. Rayber Apoyî bi xo pê dîyalogan û temasan verê dardekerdişî girewt. Dewleta tirke zî dî ke dardekerdişê Rayber Apoyî do verê şerê kurdan-tirkan ê bêpeynîyî abikero. Coka polîtîkaya pûçkerdişî arde ca. No zî sîstemê tecrîd û îşkenceyî yê Îmraliyî bi. Înan seba ke bi hawayêkê fîzîkî Rayber Apoyî îmha nêkerd, plan kerd ke bi hawayêkê fikrî mîyanê nê zîndanî de ey îmha bikerê, bêtesîr bikerê, PKKyî tasfîye bikerê, têkoşînê kurdan bişiknê, qirkerdişê kurdan bîyarê ca.
La eqsê ci bi. Rayber Apoyî bi têkoşîn û xoverdayîşî şarê kurdî, têgêrayîşê azadîye reyde no sîstem zî bin kerd. Rayber Apoyî Îmrali de wend, cigêrayîşî kerdî û PKK vurna. Rayber Apoyî Îmrali de pawitişê xo nuştî, pêşkêşê şar û rayaumûmîye kerdî, fikrê Kurdîstanê Azadî-Tirkîyaya Demokratîke û pradîgmaya xo eşt werte û têkoşînê xo yê Îmraliyî de ser kewt. Fikrê Rayber Apoyî Îmraliyî ra vilayê pêro neteweyan bîyî. Bi nê hawayî zî sîstemê Îmraliyî ame parçekerdene.
24 serrî yo sîstemê Îmraliyî xeta qirkerdişî de yeno caardene. 19 serrî yo Rayber Apoyî ra xeberêke nêna girewtene. A raşte îqtîdarê AKP-MHPyî zî, dewleta tirke zî fikranê Rayber Apoyî ra tersenê. Sîstemê Îmraliyî seba pêro merdiman û welatî tehluke yo.” BEHDÎNAN
