Endamê Komîteya Rayberdişî ya PKKyî Duran Kalkanî Medya Haber TVyî rê derheqê tecrîdê Îmraliyî, Menga Şehîdan û weçînayîşanê 14ê Gulane de qisey kerd.
Qiseykerdişê Kalkanî ra tay noqtayê girîngî wina yê:
”Tecrîdê Îmraliyî bi giranî dewam keno. 26 mengî yo ma Rayber Apoyî ra xeberêke nêgirewte. Şar hêrsbîyaye yo û qerqilîyeno. Prosesê weçînayîşî de Rayber Apo ame rojdem la meseleya kurdan nêameye rojdem. Tay terefan kerd ke Rayber Apoyî bikerê hacetê weçînayîşî, ey ser o nîqaşî kerdî. No tewirê nê kesan bêexlaq û bêrûmet o. Rayber Apo îradeyê çareserîya meseleya kurdan o. O alternatîfê sîyasetê Tirkîya yo. Îqtîdar û tay kesê bînî bi hawayêkê faşîst û dişmenî nêzdîyê Rayberîye benê. A raşte no zî yew polîtîka ya.
Têkoşîn û xoverdayîşê seba azadîya Rayber Apoyî her cayî rê vila beno, xurtêt beno. Çunke fikrê Rayber Apoyî merdimatîye rê xizmet kenê, her kes hewceyê nê fikran o. Delegasyonê Haştîye yê Îmraliyî yo Mîyanneteweyî vera tecrîdî mîyanê xîretanê ercîyayeyan de yo. Hetê bînî ra mesuldarê nê tecrîdî sey NATO, Yewîya Ewropa û Amerîka dezgehê mîyanneteweyî û welatê xerîbî yê. Ganî şarê ma û dostê ma, dezgehê haştîye pê tewirê xo tecrîdê Îmraliyî hîna zaf teşhîr bikerê, têkoşînî xurtêr bikerê.
Ez şexsê embaz Hakî Karerî de pêro şehîdanê têkoşînî bi rêzdarî yad kena. Ma Menga Şehîdan de yê. Ma do xeta şehîdan de qetî ser bikewê. PKK vîrameyîşê embaz Hakî Karero ke şehîdê ma yo verên o, ser o ronîya û bîyo partîya şehîdan. Embaz Hakî Karer 18ê gulana 1977î de Dîlok de netîceya dafikêka dewlete de şehîd bibi. Menga gulane de ma şehîdê pîlî dayî. Pêro şehîdanê ma ruhê Roja Şehîdan a 18ê Gulane pîlêr kerd. Ganî ma raştîya şehîdan hol fam bikerê. Şehîdê ma, hêzê ma yê bingeyî yê, ê serkêşê ma yê; şehîdî ma rêxistin kenê, yew xete ser de vindarnenê û perwerde kenê. Şarê kurdî û têgêrayîşê azadîye serkêşîya şehîdan de, fermandarîya şehîdan de ciwîyenê.
Ganî ma bi wesîleya Roja Şehîdan û Menga Şehîdan xo hîna zaf rexne bikerê, biercnê û kêmasîyanê xo raşt bikerê. Ganî ma xeta şehîdan de xo aver berê. Wa her kes raştîya şehîdan hol fam bikero, biwano. Ma do xeta şehîdan de serra 47. ya têkoşînî de têkoşînê xo ser bivisnê. Ma soz danê ke vîrameyîşanê şehîdanê xo bidê ciwîyayene û armancanê înan bîyarê ca.
Weçînayîşê 14ê gulane bi hawayêkê edîl, têdûşt û demokratîkî nêvîyartî. Tede hîle, dek û dolabî zaf bîyî. Xora netîceyê weçînayîşan hema bi temamî eşkera nêbîyê. Reyna zî seba ke şîyo sindoqan ser ez şarê ma fîraz kenê, ci rê sipas kena. Nê weçînayîşan mojna ke şarê kurdî tewirê xo nêbedilnayo, apey nêşîyo. Nê weçînayîşan de zî kurdan mojna ke ê çareserîya meseleya kurdan wazenê. Tay partîyî vanê ke kêmasîyê înan est ê, do rexneyanê xo bidê. Eke kêmasî yan zî xeletîya înan est a xora ganî rexneyanê xo bidê. La şarê ma bêkêmasî erkê xo ardo ca.
Ez bi taybetî şarê Dêrsimî fîraz kena. Şarê Dêrsimî wayîrê xoverdayîşê xo vejîta. Şarê Dêrsimî xo rê temsîlkarêka-wekîlêka cinîye weçînaye. No tewirê înan cayê fîrazkerdişî yo, sereberzî ya. Ez şarê Colemêrgî zî fîraz kena ke 3 wekîlê xo vetî. Ez şarê Dêrsim û Colemêrgî selam kena. Nê wird cayî zî kelayê xoverdayîşî û welatperwerî yê. Nê wird şaristanê ma seke nimûneya tewirê şarê kurdî yê.
Ecêb o ke îqtîdarê AKP-MHPyî hende rayî girewtî. Xora peyê AKP-MHPyî de hêzê mîyanneteweyî est ê la hetê bînî ra AKP-MHPyî xo rêxistin kerdo. Îtîfaqê Miletî û Îtîfaqê Kede û Azadîye hetê xorêxistinkerdişî ra kêm mendo. Îtîfaqê Kede û Azadîye vano ke ê do rexneyanê xo bikerê. Ganî bikerê. La her çî ra ver ganî xo hol rêxistin bikerê. Îtîfaqê Kede û Azadîye verê xo zaf dayo rêxistinanê çepe û şorişgêr-demokratan. La dormeyanê Îslamî û antîkapîtalîstan ra xo dûrî girewt. Ganî Îtîfaqê Kede û Azadîye verarê xo her kesî rê abikerdêne. Îtîfaqê Kede û Azadîye teyna şi verê bingeyê xo, coka hende rayî AKPyî girewtî. Vakurê Kurdîstanî de AKPyî senî hende rayî girewtê? Ganî no zî bêro ercnayene.
Seba weçînayîşê Serekkomarîye ma do nika ra çîyêk nêvajê. La kam bêro weçînayene mecbûr o ke kurdan reyde têbigêro. Seke ma vatbi; têkoşînê ma do her şertî de dewam bikero. Ferasetê AKP-MHPyî yo faşîst, turanperwer û antîdemokratîk keno ke xo mende bikero û sîyasetî rê hakîm bibo. Eke no rejîmo faşîst wina dewam bikero, hetê sîyasetî ra nêro wedaritene no do seba her kesî bibo tehluke. Coka wa her kes seba ke no sîyaset û feraseto qirker, kolonyalîst, faşîst werte ra bêro wedaritene tewrê têkoşînî bibo. Hêzê demokratîk û şorişgêrî zî ganî serkêşîya ney bikerê. Ganî ma vera ferasetê AKP-MHPyî bi hawayêkê topyekûnî têkoşîn bikerê, seferber bibê.” BEHDÎNAN
