Partîya Demokratîke ya Şaran (HDP) Kampanyaya ‘Her kesî rê edalet’ Anqara de daye destpêkerdene. Hemserekê HDPyî Pervîne Buldan û Mîthat Sancar tewrê bernameyî bîyî. Bernameyî pê deqayêkê rêzgirewtişî dest pêkerd. Hetkarê Hemserekanê Pêroyîyan ê Îdareyanê Herêmîyan ra Berpirsîyar Salîm Kaplan û Endama Heyetê Rayberdişî yê Merkezî Îlknure Bîngol qisey kerd.
Bername de Hemvervatoxê verênî yê HDKyî Onur Hamzaoglu, Wezîrê verênî Zîya Halîsî, sîyasetmedarê kurdî Tarik Zîya Ekîncî, nuştox Dogu Ergîlî, sîyasetmedare Nesrîne Nas, Serekê Rûmetî yê HDPyî Ertugrul Kurkçuyî qisey kerd û înan bale ante xoverdayîş û têkoşînê seba azadî, demokrasî û edaletî ser. Mesajê Hemserekanê Pêroyî yê HDPyî yê verênan Fîgene Yuksekdag û Selahattîn Demîrtaş zî ameyî wendene.
Yuksekdage vat: ”Ganî ma bi gamanê pîtan rayra şirê ke Tirkîya de edaletê sîyasî û komelkî înşa bikerê. Ma têna semedê xo ney semedê her kesî vanê edalet. Eke yew ca de edalet çînêbo ma nêeşkenê peyê xo ci bikerê. Eke heqê kesekî/e yeno werdene ma nêeşkenê vera naye bêveng bimanê û çimanê xo biqefilnê. No goreyê edaletê ma nîyo. Terazîya edaletî HDP yo. Ma do pêro pîya bigêrê, bivînê û bivejê.”
Demîrtaşî zî vat: ”Heta ewro mi rojêke zî mehkemeyan ra tehlîyeya xo nêweşate. Ez zana ke ez hetê huqûqî ra nêameya tepiştene. Înan ke ez sey rehîneya sîyasîye tepişta û şawita zîndan dadgerî nêbî. Bedelê çi beno wa bibo ez do tim nê tewirê xo rê dewam bikerê. La ê do narey lezabez bi hukmkerdişê nêraştî ma bikerê hukmkerde û biwazê ke nê qerarî rê hurmet bêro ramitene.” ANQARA
