Partiya Demokratîk a Gelan (HDP) di pêvajoya şewba vîrûsa koronayê (Covîd-19) de dest bi ‘Kampanyaya Malbatên Xwişk û Bira’ kir. HDP’ê di vê çarçoveyê de li Enqereyê 53 malbat bi malbatên xwişk û biran re anîn gel hev û alîkariya xurekê da 150 malbatan. Hevserokê HDP’ê yê Enqereyê Vezîr Coşkun Parlak diyar kir ku ew bi rêxistinên 13 navçeyan re dixebitin û armanc dikin ku kampanyaya xwe mezintir bikin.
Parlak destnîşan kir ku malbatên ji neçarî koçî bajaran bûn, di şertên zor de jiyana xwe didomînin û wiha got: “Ev malbat berî şewbê jî di şert û mercên zor û zehmet de dixebitin û bi pereyên rojane qezenc dikirin debara xwe dikirin. Niha bi şewbê re, gelek welatî ji kar hatin derxistin û gelek kes bê kar mane. Em bi navbeynkariya komîsyona xwe ya tesptkirinê, pêdiviyên weke xurek, tenduristî, paqijî û dezenfektanê yên bingehîn digihînin malbatên ku hewcehiya wan hene.”
Herî dawî jî Parlak ev tişt destnîşan kir: “Em hewl didin xwe bigihînin hemû malbatên ku hewcehiya wan bi alîkariyê heye. Em dixwazin pêdiviyên kesên xizan pêşwazî bikin. Malbatên ku pêdiviyên wan heyî divê teqez xwe bigihînin me. Em ê li gorî derfetên xwe, alîkariyê bidin wan. Bi şewbê re tirsê hatiye avakirin. Rewşekê ku mirov tenê xwe bifikirin hatiye pêşxistin. Lê em dikarin li dijî van polîtîkayan yekitî û piştevaniya xwe ava bikin. Yên ku dixwazin piştgiriyê bidin kampanyaya me, divê demildest xwe bigihînin me. Ji ber ku malbatên wan ên xwişk û bira li benda wan in.” ENQERE
