Wezaretê Karanê Teberî yê Kanada pê eşkerayîyêke pare kerd ke netîceya cigêrayîşêkî de ame tesbîtkerdene ke teknolojîya çekan ke înan rotbî Tirkîya şerê Karabagî de şuxilîyayî.
Wezîrê Karanê Teberî Marc Garneauyî îfade kerd ke no têgêrayîşê Tirkîya dûştê polîtîkayanê Kanada û sozanê Tirkîya yo. Marc Garneauyî ard ziwan ke înan no çi Wezîrê Karanê Teberî Mevlut Çavuşogluyî rê zî vato.
Marc Garneauyî eşkera kerd ke înan rotişê çekan ê seba Tirkîya bi temamî betal kerd û ê do ameyoxê rotişê çekan ê seba Tirkîya ser o çarçewa bernameyê hemkarîya bi NATOyî de ‘yew bi yew’ cigêrayîş bikerê.
Kanada heta 2019î çekî bi taybetî teknolojîya çekan rotî Tirkîya. Dewleta tirke na teknolojî Lîbya, Karabag û Kurdîstan de xebitnaye. Par weşanayîşê raporêkî ra dima hukmatê Kanada rotişê çekan ê seba Tirkîya vindarnabi. OTTAWA
