Hetê Şaredarîya Kanîreşî û Odaya Esnaf û Senetkaran ra, seba ke ocaxan qeza de çaye rê 25 qurişî zem kerd heme ocaxê çaye ameyî morkerdene
Ocaxê çaye yê ke qezaya Kanîreşî ya Çewlîgî de fealîyet kenê, çaya 75 qurişî rê 25 qurişî zem kerd. Şaredarîya qeza û Odaya Esnaf û Senetkaran bi qerarêkê hemparî hemverê rotişê çaye bi vaya 1 lîreyî 18 ocaxê çaye yê ke qeza de bîyî mor kerdî. Ocaxê çaye yê ke ewro saetanê sibayî de hetê zabitayan ra ameyî morkerdene wayîrê înan rê sey mazereto tekane zemo 25 quriş ame vatene.
Hetêk ra ocaxê çaye qeza de ameyê morkerdene, la hetêna ra Ocaxa Çaye ya 15ê temmuze ya Ciwanîye ke aîdê şaredarîye ya û Ovapark AVMyo ke yeno vatene aîdê birayanê serekê şaredarîye yo de çaye hewna 1 lîreyî roşîyena.
Wayîrê ocaxanê çaye qerarî rê reaksîyon da û va: “Mîyanê mengêk de çaye û elektrîkî rê se ra 30 zem ame kerdene. Kîrayanê ma rê se ra 40 zem ame kerdene. Şekirî rê zem ame. Ma xebetênê, karkerê ma estê. Xizmet kenê. Bedelê xizmetê ma înan rê zaf yeno. Zemo ke her çîyî rê ameyo kerdene nêvînenê 25 qurişê ma vînenê.”
Esnafê ke dimayê qerarî ra şîyî Odaya Esnaf û Senetkaran waşt ke problem tavilî bêro halkerdene. ÇEWLÎG
